72 яшьлек әбигә штраф салганнар

Әмма, аңын, күзен акча томалаган булса, алар бу хакта, ахырда җавап тотарга туры килүе турында уйланып торамы икән?

 

Искә төтшерергә куркыныч булган 90-нчы елларда шәһәрдә яшәүче әбиләр дә бу “эшкуарлык”ка остарып алган иде.  Аракы сату тыелган көннәрдә, сәгатьләрдә бер гаепсез , көнбагыш кына сатып утыручы әбиләрнең итәк астында шундый агулы сыекчаның шактый запасы булган. Мондый очраклар буенча бер генә протокол төзелмәгән. Менә шундый сәүдәгәр каны кайнаудан тынмаган әбиләр бүген дә – шәһәрдә дә, авылларда да бар, кызганычка каршы.

 

Әйтик, Башкортстанда Кушнаренко район суды 72 (!) яшьлек әбине «незаконная розничная продажа алкогольной и спиртосодержащей продукции, если это деяние совершено неоднократно, за исключением случаев, предусмотренных статьей 151.1 УК РФ» маддәсе буенча җавапка тарттырган.

 

Пенсионер әби гаебен таныган. Суд, гуманлылык күрсәтеп, гаебен тануын, авыруын исәпкә алып, 50 мең сум штрафны 10 ай дәвамында бүлеп түләргә дигән шарт белән җәза чыгарган. Суд карары әле гамәлгә кертелмәгән.

 

Әбине дә кызганыч.  Ак яулыгын бәйләп, намазда утырасы бит, ә ул “ак альяпкычлы” агу сатып, табыш алырга хирысланган. Даруга акча җыйганмы ул, берәрсе мәҗбүриләгәнме, башка сәбюәпләр белән шул юлга басканмы,  анысы әйтелми, хәер әйтелсә дә, ялгышкан ул!

 

Аракы һәм ялган спиртлы эчемлекләр белән сәүдә итүчеләр  Ходай алдында тотасы җәзаны уйлаудан ерак булсалар да, күршеләрендә яшәгән гаиләләрне,  андагы балаларны, авылдашлары язмышын башлап уйласыннар иде дә соң...

 

 Полиция хезмәткәрләре бик авырлык белән кулыннан тотып, штраф салган очракта да, бу “кара сәүдәгәрләр” ул сумнарны шул ук юл белән тиз үк кире кайтара, диләр. Кем белә, бүлеп түләнәсе штрафлар нинди керемнән түләнер икән?

Фото: фрипик.ком

Автор:Алсу Гәрәева