Бүген талантлы баянчы Фәнис Гыйльметдиновның туган көне (ФОТО)

Бүген – 14 май көнне талантлы музыкант, баянчы, педагог, Татарстанның атказанган сәнгать эшлеклесе Фәнис Миңнуретдин улы Гыйльметдиновның туган көне! Аңа 80 яшь! Котлыйбыз!

Ул 1943 елның 14 маенда Татарстанның Актаныш районы Иске Байсар авылында туа. 1969 елда Казан музыка училищесын, 1979 елда Казан дәүләт консерваториясен тәмамлый. Училищены тәмамлагач, Г.Тукай исемендәге Татар дәүләт филармониясенә эшкә чакырыла: Татар дәүләт җыр һәм бию ансамблендә, музыкаль-әдәби лекторий бүлегендә (1969-1970) эшләгәндә танылган җырчыларга уйный. Ул 1971-1974, 1979-1991 елларда филармониянең эстрада бүлегендә эшләгәндә дә күренекле җырчы Әлфия Авзалованың һәм башка җырчыларның баянчы-аккомпаниаторы була.

Фәнис Гыйльметдинов 1991 елда, Казан педагогика институты ректораты чакыруы буенча, «Музыкаль тәрбия нигезләре» кафедрасына укытырга килә, анда 2003 елга кадәр доцент булып эшли.

«Аның кулына эләккән баян үзеннән үзе уйный, бии башлый иде» – дип искә алалар аның чыгышы хакында сәхнәдәшләре. Татарстан телевидениесе архивында Фәнис Гыйльметдиновның татар композиторлары әсәрләренең һәм татар халык көйләренең баян өчен күчермәләреннән торган ике концертының видеоязмасы саклана. Радио архивында аның башкаруында Исмай Шәмсетдинов иҗат иткән көйләр, Хөснул Вәлиуллин вальслары, Мирсәет Яруллинның маршы, Заһид Хәбибуллинның полькасы, Александр Ключаревның «Бәйрәмдә», Мансур Мозафаровның «Кызлар биюе», башкорт халык бию көе «Бишбармак», татар халык көе «Шөгер» язмалары саклана. Әлфия Авзалованың 1976 һәм 1981 елда чыккан пластинкалары шулай ук Фәнис Гыйльметдинов белән бергә язылган.

Ф. М. Гыйльметдинов «Баянда үзлегеңнән уйнарга өйрәнү өчен кулланма» (1980), «Баян өчен реперуар» (1988), «Баян өчен заман көйләре» (2009) китаплары авторы. «Ялкын», «Мәгариф» журналларында озак еллар «Баянда уйнарга өйрән» сәхифәсен алып бара. Ул соңгы елларда Г.Тукай исемендәге Татар дәүләт филармониясе «Илһамият» сәхнә ветераннары клубы оештырган төрле чараларда, концертларда чыгыш ясады.

Күркәм юбилее белән тәбрик итеп, сәхнә остасына саулык-сәламәтлек, озын гомер, бәрәкәтле, имин тормыш телибез.

Җырчы Наҗия Теркулова белән

Җырлый – Эмиль Җәләлетдинов, баянда – Фәнис Гыйльметдинов. Түбән Кама шәһәре. 1975 ел

Әлфия Авзалова, Фәнис Гыйльметдинов. 80-нче еллар

Фәнис Гыйльметдинов укучысы белән. 2005 ел

Фәнис Гыйльметдинов гармунчыларга багышланган кичәдә. Татар филармониясе. 2015 ел

Гөлзада Сафиуллинаның юбилей кичәсендә. 1997 ел

Бертөркем гармунчы-музыкантлар белән. Татар филармониясе. 2014 ел

Эмиль Җәләлетдинов белән. Г.Тукай исемендәге Татар дәүләт филармониясе. 2015 ел

Җырчылар – Рәшит Гобәйдуллинны, Риф Сафиуллинны искә алу кичәсендә. 2015 ел