Татар китабы йортында «Бәхет елы» спектакле тәкъдим ителәчәк

30 гыйнварда Татар китабы йортында – Шәриф Камалның мемориаль фатиры булган татар әдәбияты тарихы музеенда «Бәхет елы» спектакленең премьерасы узачак. Мәскәү режиссеры Әминә Миндиярованың постановкасы татар язучысы-классигы шәхесен яңача ача.

«Бәхет елы» — музей белән театр, авырту һәм рәхәтлек, протоколлар катгыйлыгы һәм шәхси хатларның җиңеллеге берләшкән зур эзләнү ул. Бу спектакльдә тамашачы 1937 елгы Шәриф Камал белән очраша. Янында исә гаилә әгъзалары, хатыны Хәят, кызы Зәйнәп, улы Йосыф, замандашлары, дуслары һәм дошманнары. Сәхнәләр язучы яшәгән йортта, шул исәптән, ул исән чактагы күренеш сакланган мемориаль фатирда күрсәтелә.

Спектакльдә каршылыклы чорның катлаулы шәхесе башка яктан ачыла. Шәриф Камал турында кайбер мифлар да юкка чыгарыла. Сценарий исә Шәриф Камал архивыннан моңарчы җәмәгатьчелеккә ачылмаган хатлар һәм документларга нигезләнә. Спектакльне режиссер Әминә Миндияр куйды.

«Бәхет елы» — театрлар һәм музейлар коллаборациясенең чираттагы мисалы. Спектакль Галиәсгар Камал, Габдулла Кариев һәм Кәрим Тинчурин театрлары белән берлектә сәхнәгә куела. Проект Татарстан Республикасы Мәдәният министрлыгы ярдәме белән гамәлгә ашырыла.

Премьера көнендә спектакльне 18:00 дә һәм 20:00 дә күрсәтәчәкләр. Алга таба ай саен күрсәтү планлаштырыла. Спектакль татар телендә синхрон тәрҗемәсез бара. Керү билетлар буенча башкарыла, дип хәбәр итә ТР Милли музееның матбугат хезмәте.