Әгерҗедә район җитәкчелеге алмашынды

Азат Вәлиев, узган елгы эшләре турында хисап тотканда, районда тулай территориаль продуктының 8,4 млрд сумга җиткәнен әйтте. Бер ел эчендә райондагы эре һәм урта предприятиеләрдәге уртача хезмәт хакы, 11 процентка артып, 39891 сумга җиткән. Районда «Әгерҗе» логистик сәнәгать паркы төзелә. Аңа 5,4 миллиард сум күләмендә инвестиция салырга ниятлиләр, 300ләп яңа эш урыны пәйда булыр дип көтелә. Районда туризм тармагын да үстермәкчеләр. Красный Бор авылында туристик кластер төзергә җыеналар.

 

Фәрит Мөхәммәтшин узган ел башкарылган эшләр өчен район җитәкчелегенә рәхмәт белдерде. Шулай да Әгерҗе социаль-икътисадый үсеш рейтингында 41 нче урында гына тора. Дөрес, аннан алдагы елда район өч баскычка астарак булган. Дәүләт Советы Рәисе булган мөмкинлекләрдән нәтиҗәле файдаланырга кушты.

 

– Уртада гына таптанып тормагыз. Сезнең алдынгылар арасында булган заманнар да бар иде бит. Димәк, мөмкинлекләр бар, – диде Фәрит Мөхәммәтшин. – Әгерҗедә тырыш халык яши. Шушы өстенлектән файдаланып, республика җитәкчелеге ярдәме һәм Әгерҗе халкының тырышлыгы белән вазгыятьне уңай якка үзгәртеп булыр дип өметләнәм.

 

Утырышта Әгерҗе район башлыгы Азат Вәлиевнең отставкасын кабул иттеләр. Аның белән беррәттән Башкарма комитет җитәкчесе Рөстәм Шәрипов та вазыйфасыннан китәргә теләк белдерде.

– Мин һәрчак район халкы мәнфәгатьләрен кайгыртып эшләдем. Күп кенә проблемалы мәсьәләләрне хәл итеп булды, эшлиселәре дә җитәрлек. Без агым уңаена гына бармадык, яңа проектлар уйлап таптык, Әгерҗе районының абруен күтәрү өчен тырыштык, – диде Азат Вәлиев.

 

Әгерҗегә алга таба Ленар Нургаянов җитәкчелек итәчәк. Район советының чираттагы утырышында аны башкарма комитет җитәкчесе вазыйфасын башкаручы итеп сайладылар. Ул – тумышы белән Әгерҗенең Тирсә авылыннан. Ун елдан артык районның авыл хуҗалыгы сәнәгате оешмаларында эшләгән. Аннары хезмәт юлын Алабуга районында дәвам иттергән. Авыл хуҗалыгы идарәсе башлыгы, башкарма комитет җитәкчесе булып эшләгән. «Сез Әгерҗе районы һәм аның халкы алдына куелган катлаулы бурычларны уңышлы гына башкарып чыгарсыз дип өметләнәм», – диде Фәрит Мөхәммәтшин яңа җитәкчегә.

 

Фото: elabuga-rt.ru