30.11.2022 Спорт

Алексей Абрамов: “Тормыш көрәштән тора. Көрәш һәм җиң!”

Алексей Абрамов — милли көрәш буенча — бер, билбау көрәше буенча өч тапкыр дөнья чемпионы булган көрәшче. Ике төрдә дә спорт остасы исеменә ирешкән. Көрәш белән кечкенәдән мавыга. Девизы да шуңа бәйле: “Тормыш көрәштән тора. Көрәш һәм җиң!”

Алексей Алексеевск шәһәр тибындагы бистәдә туып-үскән. Гаиләсе белән Казанда яши. Хәзерге вакытта Лаеш районының Усад бистәсендә ирекле көрәш буенча тренер вазыйфасын башкара. Билбау көрәше буенча Алексеевск районы өчен көрәшә (классик стильдә 62 кг авырлыкта). Милли көрәш буенча 60 кг авырлыкта Лаеш районы өчен чыгыш ясый.

— Балалар бакчасына әзерлек төркеменә йөргәндә, алты яшьтә көрәш белән шөгыльләнә башладым. Көрәш дөньясында миңа кечкенәдән рәхәт булды. Тренер миндә ныклык, түземлек тәрбияләде. Иң беренче мине көрәш түгәрәгенә мәктәптә сакчы булып эшләүче күрше апа чакырды. Бу спортка мәхәббәт әни ягыннан бабамнан салынгандыр, ул грек-рим стилендә оста көрәшче иде. Беренче тренерым Бари Равил улы Сөләйманов — Россиянең атказанган тренеры. Хәзерге вакытта аның улы, Россиянең атказанган спорт остасы, сигез тапкыр дөнья чемпионы булган Габдеҗәлил Сөләйманов җитәкчелегендә спорт университетында шөгыльләнәм.

— Иң зур призны кайда яуладың?

— 2018 елда, 18 яшемдә, ир-егетләр арасында билбау көрәше буенча дөнья чемпионы булдым, шунда алынган UFSтагы кебек билбау — иң зур призым. Акча була да бетә. Иң мөһиме — спортта лаеклы исемнәр яулау өчен көрәшәсең.

Лилия ЙОСЫПОВА
Ирек мәйданы
№ --- | 30.11.2022