“Әбиемнең өчпочмакларын сагынып кайтам”

— Хоккей белән ничә яшьтә кызыксына башладың?

— Ул чакта миңа 7 яшь иде. Югары Ослан районында тудым, Сабабаш авылында яшәдем, Байлар Сабасында укыдым. Тренерыбыз Камил абый Галимҗанов мәктәпкә керде дә, кичкә килегез дип, безне урамдагы ачык стадионга чакырды. Ул чакта ябык шугалак юк иде әле. Беренче уенда ук хоккей мине үзенә алып керде. Ярты елдан соң ябык шугалакны төзеп бетерделәр. Безне шунда автобус белән йөртә башладылар. Кәшәкә бирделәр. Ул чакта махсус форма юк иде. Соңрак анысын да кайтардылар. Бөтенесен бушлай бирделәр. Кайчандыр зур клубларда уйнармын дигән уй булмады. Әлбәттә, хыял бар иде. Әти-әни бик терәк булды. “Нишләп үзеңне сынап карамаска?! Бәлки, килеп чыгар”, — дип мине шул юлга керттеләр, гел булыштылар. Аннары “Тимерхан” командасына йөри башладым, 12-14 яшьләремдә “Ак Барс” клубында уйнадым. 14 яшьтән Мәскәү “Динамо”сына күчтем. Анда өч ел уйнадым. Интернатта яшәдем.

 

— 82 нче номер астында уйныйсың. Нәрсәгә бәйләп сайладың?

— Күп тапкыр 28 нче номер астында уйнадым. Командага миннән өлкәнрәк егет килгәч, бу номерны аңа бирдем. Шулай дөресрәк булыр, дидем. Үземә “көзгеле” номер — 82 нчене алдым.

 

— Уенда позицияң — саклаучы. Капкачы булырга да теләгәнсең икән.

— Ул теләк Сабада чакта гына булып алды. Аннары онытылды. Ә хәзер, киресенчә, капкада басу түгел, ә уйнау күбрәк ошый.

 

— Нинди ял яратасың?

— Актив ял ошый. Футбол уйнарга яратам, балык тотарга йөрим.

— Уен алдыннан юрау-ышануың да бар икән.

— Яшьрәк чакта керде миңа ул гадәт. Кайдан, ни өчен икәнен аңлата алмыйм. Уен алдыннан форманы сул ягыннан кия башлыйм. Хәзер бу гадәт башыма шулхәтле сеңгән, гел шулай эшлим.

 

— Әти-әниең Сабада яшиме?

— Мин Сабада чакта, әти дә анда яшәде. Хәзер башка шәһәргә күченде. Аралашып, күрешеп торабыз. Ә әни 2013 елда юл һәлакәтендә вафат булды.

— Туган якка кайтасыңмы? Анда кемнәрең бар?

— Май-июнь — ике ай отпуск. Туган якка елга бер җәен кайтам. Анда әби-бабам, туганнарым, дусларым яши. Туган як барыбер үзенә тарта. Балачак шунда узды бит. Рәхәтләнеп ял итәм. Отпуск вакытында да тренировкага баргалыйм. Чөнки аннары үзеңне яңадан әзерләү, җыю авыррак була.

— Әбиең әзерләгән нинди милли ризыкларны сагынып кайтасың?

— Өчпочмак һәм чебурек. Әби шундый тәмле итеп әзерли. Кайткач, бер-ике атна иркенләп ашыйм. Авылда андый ризыклардан баш тартып булмый. Сезон башланыр алдыннан, туклануны яңадан җайга салам.

 

— Үзең әзерли беләсеңме?

— Йомырка тәбәсе генә кыздыра алам. Интернеттан ризыкларның әзерләү тәртибен карап эшләсәм, булдыра алырмын дип уйлыйм.

— Татарча беләсеңме?

— Балачакта гел әби-бабайда кала идем, алар әкренләп өйрәтте. Мәктәптә татар телен VII сыйныфка кадәр ныклы “4”легә укыдым. Болай русча сөйләшәм.

 

— ЦСКАда тагын бер милләттәшебез — Самара егете Таһир Мингачев та бар бит әле. Яхшы аралашасызмы?

— Әйе, бик җылы аралашабыз. Гомумән, безнең коллектив дус. Күптән түгел Таһирның туе булды. Мине дә чакырган иде. Әмма бара алмадым.

— Үзеңнең туй көтелмиме соң?

— Очрашкан кызым бар. Ул да спортчы, тренер. Ярышларда йөри. Икебезнең дә вакыт тыгыз. Очрашулар сирәгрәк, шуңа ешрак “онлайн мәхәббәт” (көлә).

 

— Хоккей белән кызыксынучы балаларга нинди киңәшләр бирер идең?

— Максат куеп, шуңа таба барырга кирәк. Әти-әнинең терәк булуы зур роль уйный. Аларның ышануы мөһим. Миңа ышандылар. 12 яшемнән үзләре яныннан чыгарып җибәрәсе килмәсә дә, хискә бирелмәделәр, ә теләгемне чынга ашырырга юл куйдылар. Миңа чыгып китү кыен булмады.

Аннары, балаларга шартлар тудыру да кирәк. Сабаны алсак, анда мөмкинлекләр күп. Стадионнар, боз, менә дигән тренерлар — бөтенесе дә бар. Һәм алар бушка. Кил, шөгыльлән, спортчы булып үс! Әмма андый шартлар бөтен җирдә дә тудырылган дип мактанып булмый.

— Еш кына кайбер яшь җырчы, спортчылар, аз гына танылуга, “йолдызлана” башлый. Син бик гади.

— “Йолдызлана” белмим, моны кирәк тә санамыйм. Гади авыл малае бит мин.