24.11.2021 Шоу-бизнес

Питер җырчысы Руслан Трапезников яңа КЛИП чыгарды

Санкт-Петербург шәһәрендә яшәп иҗат итүче җырчы Руслан Трапезниковның “Бүген” исемле клибы дөнья күрде. Клип Казан каласында төшерелгән. Әлеге шатлыклы яңалык уңаеннан "Матбугат.ру" хәбәрчесе Руслан белән әңгәмә корды.

- Руслан, премьерагыз белән!

- Рәхмәт! Бик көтеп алынган клип булды. Чынлыкта безгә бу клипны ике тапкыр төшерергә туры килде. Беренче вариантны тулаем үзгәрттек. Төп рольдә биюче кыз төште.

Җырның асылында бүгенге көн белән яшәргә кирәк дигән фикер ята. Гел киләчәкне уйлап яки нәрсәдер көтеп гомер кичерү дөрес түгел. Үткәннәр белән дә яшәргә ярамый. Монда һәм хәзер яшәргә кирәк. Җырның сүзләрен танылган шагыйрә Гөлсәрвәр иҗат итте. Репертуарымдагы “Адашма җилләрдә” җырының сүзләрен дә ул язган иде.

- Руслан, татарча шундый әйбәт сөйләшәсез. Ә фамилиягез русча. Тумышыгыз белән кайдан сез?

- Әнием татар, әтием рус милләтеннән. Шуңа фамилиям дә Трапезников. Төмән өлкәсендә туганмын. Әтием Пермь төбәгеннән иде, әнием Бөгелмә шәһәреннән. Татарстанга күченгәндә, миңа 6 яшь булган. Әлмәт районының Нәдер авылында яшәдек. Татар телен бөтенләй белмәгәнмен. Аны мәктәптә генә өйрәнә башладым. Хәзер татарча яхшы беләм, дия алам, татар телендә җырлар да язам. Казанда энергетика университетын тәмамладым. Шуннан соң бер ел Әлмәт шәһәрендә яшәп алдым. Казанга килдем, аннан Мәскәүгә юл тоттым, инде менә Санкт-Петербургта. Монда күчкәнемә җиде ел булды.

Биредә мин җырчы гына түгел, төрле чаралар оештыру белән шөгыльләнәм. Минемчә, иҗат кешесе гел эзләнүдә булырга тиеш. Бер урында гына тора торган кеше түгелмен. Тормышның, вакытның кадерен белергә, беркайчан да үпкә сакламаска кирәк. Һәр мизгел соңгы булырга мөмкин. “Бүген” клибының асылына да әнә шул мәгънә салынган.

Эльза ГАЗИЗОВА
Матбугат.ру
№ --- | 24.11.2021