«ШАЯН ТВ» алып баручысы Элдар Гыйниятов Балалар һәм яшьләр эшләре комитеты рәисе вазифасына иң яшь кандидат буларак табылды

Әлеге яңалык бик кызыксындырды һәм без Элдарга берничә сорау бирергә булдык.

- Элдар, ни өчен син катнашырга уйладың? Үзең теләк белдердеңме? Яки әти-әниең киңәш иттеме?

- Мин инстаграмда реклама күреп алдым да, анкетаны тутырып карарга булдым. Бу минем өчен кызык булып тоелды. Минем башка балаларга үрнәк буласым килә. Кешеләргә һәм табигатькә ярдәм итеп яшәргә телим. Әти-әнигә моның турында алар эштән кайткач кына сөйләдем. Алар мине мактадылар һәм, нишләптер, көлделәр.

-  Син катнашучылар (кандидатлар) арасында иң яше - курыкмадыңмы? 

- Юк курыкмадым, мин бары тик анкетаны гына тутырдым.

- Гомумән, синеңчә әлеге вазифаны башкаручы нинди сыйфатларга ия булырга тиеш?

- Бу вазифаны башкаручы акыллы, эшчән, тәрбияле һәм, иң мөһиме, тәртипле булырга тиеш. Чөнки ул - безгә үрнәк кеше.

- Синеңчә ШАЯН ТВ да алган тәҗрибә җәмәгать эшләрендә файдалы булырга мөмкинме?

- Әлбәттә, «ШАЯН ТВ» да алган тәҗрибә җәмәгать эшләрендә бик тә файдалы. Безнең телеканалыбыз башкалар белән аралашырга, балаларга, яшьләргә файдалы булырга тәрбияли, күптөрле кызыклы мәгълүмат белән эш итәргә өйрәтә.

- Алга таба да мондый төр чараларда катнашырга, ә, бәлки тормышыңны шушы юнәлеш белән бәйләргә теләр идеңме?

- Әйе, әгәр дә насыйп булса, минем башкаларга файдалы буласым килә.

- Бүгенге яшьләр - алар нинди?

- Бүгенге яшләрнең төрлесе бар: кайберләре күп вакытларын гаджетларда уйнап үткәрәләр. Ә менә икенчеләре, киресенчә, спорт белән шөгыльләнә, күп укый, актив эшләрдә катнаша. Минем дә шундый буласым килә.

-  Сайлап алынган кандидатка балалар һәм яшүсмерләрдән нинди киңәшләр бирер идең?

- Мин сайлап алынган кандидатка тырышып эшләргә, ярдәмчел булырга киңәш итәр идем. Ул, башкаларга ярдәм итеп, үрнәк булырга һәм үзе бәхетле булып, эше белән башкаларны да бәхетле итәргә тиеш.