“Балачак җыры” бәйгесе җиңүчеләрен бүләкләү чарасы 1 июнь көнне узачак

«ШАЯН ТВ» каналы балаларны кечкенәдән татарча уйларга, сөйләшергә өйрәтә, татар мәдәниятен саклау һәм үстерүгә зур өлеш кертә. Бу уңайдан Татарстан Президенты каршындагы татар телен саклау һәм үстерү мәсьәләләре комиссиясе ярдәме белән «ШАЯН ТВ» каналы оештырган «Балачак җыры» бәйгесе аерым игътибарга лаек.

Аның максаты татар телендә балалар өчен җырлар иҗат итүче шагыйрь һәм композиторларны барлау, шул җырларны таныту, балалар репертуарын татар җырлары белән баетудан гыйбарәт.

Узган ел «ШАЯН ТВ» телеканалы үткәргән бәйгедә 5 җыр җиңүче дип табылды. Аларның барысына да заманча аранжировка ясалды, сыйфатлы видеоклиплар төшерелде. Җырларны “Казан нуры” халык уен кораллары оркестры, Малайлар капелласы хоры белән берлектә «Сәйлән» фестивале җиңүчеләре башкарды. Алар арасында: Амелия Феофанова, Шамил Саврилов, Миләүшә Закирова, Инсаф Ганибаев, Ислам Минһаҗев һәм Әминә Мортазина. Җырларның тексты һәм ноталары «Көмеш кыңгырау» газетасы, «Сабантуй» журналында урын алды. Бүгенге көндә әлеге җырларны балалар да яратып башкара! «Сәйлән» фестивале моңа ачык дәлил. Барлык җырлар республикабызның музыка мәктәпләренә дә таратылды.

Быел «Балачак җыры 2021 » бәйгесенә 110 җыр килде. Бу узган елгыдан ике тапкырга күбрәк! Иң яшь катнашучыга 23 яшь булса, иң өлкәненә 90 яшь! Профессиональ композиторлар, танылган шагыйрьләр белән беррәттән бәйгедә үзешчәннәр дә катнашты. Арада төрле һөнәр ияләре бар. Табиблар, укытучылар, фән эшлеклеләре, тәрбиячеләр һәм башкалар. Катнашучыларның географиясе дә киң. Үз иҗат җимешләрен Татарстан гына түгел, Мәскәү, Чиләбе өлкәсе, Башкортстан, Удмуртия, Чувашиядә яшәүче милләттәшләребез дә җибәрде.

Жюри ике составта эшләде. Беренче төркемдә профессионаллар, ягъни әдәбият, сәнгать, музыка, педагогика өлкәсендә югары дәрәҗәләргә ирешкән шәхесләр булса, икенче төркемдә – балалар: музыкаль бәйгеләр лауреатлары, ШАЯН ТВ каналы алып баручылары, блогерлар.
Икенче турга Жюри иләгеннән 20 җыр үтте. Бу этапта иң лаеклыларны сайлауга тамашачылар да җәлеп ителде. Үзләре ошаткан җырлар өчен shayantv.ru сайтында тавыш бирделәр. Интернет аша тавыш бирү юлы белән, 10 җыр 3 нче турга уза.

Быел бәйгедә кемнәр җиңәр? Тиздән беләчәкбез! “Балачак җыры” бәйгесенең 2 нче сезонында җиңүчеләрне бүләкләү чарасы 1 июнь – балаларны яклау көнендә, 11.00 сәгатьтә Горький урамы 15 адресы буенча «ШАЯН ТВ» студиясендә үтәчәк.

Тантана кунаклары:

1. Татарстан Республикасы Дәүләт Советы Рәисе урынбасары, Татарстан Республикасы Президенты каршындагы татар телен саклау һәм үстерү мәсьәләләре комиссиясе рәисе М.Г.Əхмәтов;

2. Татарстан Республикасы Дәүләт Советының Мәгариф, мәдәният, фән һәм милли мәсьәләләр комитеты рәисе, Татарстан Республикасы Дәүләт Советында «Бердәм Россия» фракциясе әгъзасы А.Р. Зарипов;

3. «Яңа гасыр»телерадиокомпаниясе» акционерлык җәмгыяте генераль директоры, Татарстан Республикасы Дәүләт Советы депутаты, Татарстан Республикасы Президенты каршындагы татар телен саклау һәм үстерү мәсьәләләре комиссиясе әгъзасы И.Ю. Әминев;

4. «Сәйлән» телевизион җыр фестивале җиңүчеләре;

5. «Балачак җыры-2021» бәйгесенең җиңүчеләре;