Урамда йөргән кием белән намаз укырга ярыймы?

"Урамда йөргән итәк белән эштә, мәчеттә намаз укырга туры килә. Ләкин урамда йөргәндә киемгә пычрак чәчрәргә, тузан кунарга мөмкин, ул намаз укыр өчен чиста саналамы? Эштә күлмәк алыштыру мөмкинлеге юк", - дип сорый Казаннан Эльмира.

Сорауга “Дин Ислам” мәчете имам-хатыйбы Инсаф хәзрәт Ибәтуллин җавап бирде:

— Мөселман өчен чисталык бик мөһим. Аны саклау, пөхтәлеккә омтылу, тышкы кыяфәтеңне тәртиптә тоту — мөселманның зур бурычы.
Киемдә ике әйбергә игътибар итәргә кирәк. Әгәр урамда йөргәндә гадәти тузан кунган икән, куркыныч түгел. Тормышта кабул ителгән пычраклык, ягъни аз гына нәҗес булмаган балчык тисә, тузан кунса, кием пычрак саналмый. Әйе, физиологик яктан бу пычрак булып тоелса да, дин күзлегеннән караганда, җир, туфрак пычрак түгел. Андый кием белән намаз уку дөрес була. Шул ук вакытта киемебез белән мәчетне пычратырга тиеш түгелбез. Киемебезне саклап, җирдән барлык пычракны җыеп йөрмичә, тәртип белән намаз укысак, куркырлык нәрсә юк.

Гомумән, динне катлауландырырга кирәкми. Нәҗес эләксә, мөмкинлек булганда, киемне алыштыру хәерле. Әгәр башкасы юк икән, бераз нәҗес тигән кием белән дә намаз уку рөхсәт ителер.