Республика Яңа ел чыршысында 8000 артык бала катнашты: иң-иңнәре белән Президент күзгә-күз очрашты

«Татнефть Арена» боз сараенда 25 декабрь көнне узган республика Яңа ел чыршысы башланыр алдыннан, Татарстан Республикасы Президенты берничә бала белән очрашты. Алар арасында балалар һәм яшьләр оешмалары вәкилләре, төрле бәйге һәм олимпиада җиңүчеләре бар иде. Әлеге очрашуда “ШАЯН ТВ” алып баручылары – Инсаф Ганибаев һәм Зилә Хәбибуллина да катнашты.

Очрашуда балалар өчен бик мөһим темалар күтәрелде. Президент балалар каналы турында да фикерләрен җиткерде. Соңрак республиканың төп чыршы бәйрәмендә катнашучыларны сәламләп, Рөстәм Миңнеханов 2019 елда WorldSkills һөнәри осталык буенча дөнья чемпионатын уздыруның төп вакыйга икәнен әйтте. 

“2020 елда да, киләчәктә дә Татарстаныбызны бөтен дөньяга танытырлык чаралар булачагына ышанабыз. Талантлы балалар, яшьләргә тудырылган мөмкинлекләр өчен президентыбызга зур рәхмәт”, - дип яза яшь алып баручылар “ШАЯН ТВ”ның интернеттагы битендә.

Республиканың төп Яңа ел чыршысында 8000 артык бала катнашты. Кышкы каникуллар алдыннан укучылар өчен чын могҗиза бәйрәме булды бу. Чыршы бәйрәменә яхшы билгеләргә генә укучылар, конкурс-фестиваль җиңүчеләре, актив укучылар, спортчылар, сәламәтлек ягыннан мөмкинлекләре чикле балалар килгән иде. Яшь буынны бәйрәм белән котлап чыгыш ясаганда Татарстан Президенты Рөстәм Миңнеханов:

«Россиядә Театр елы тәмамланып килә. Бик күп кызыклы креатив проектлар тормышка ашырылды. Узып барган ел яшьләр сәясәтенең дә юбилей елы булды. Республика тарихында бик мөһим чорны – ТАССРның 100 еллык юбилеен зурлап уздырасы бар. Бөек Җиңүнең 75 еллыгы да – безнең өчен зур вакыйга! Сезнең белән зур уңышларга ирешәчәгебезгә ышанам. Үзегезгә ышаныгыз, зур максатлар куеыгыз һәм шуларга ирешегез! Без Татарстанның киләчәгенә ышанабыз!» - диде.

Чарадан һәр кунак күтәренке кәеф белән генә түгел, истәлекле бүләк белән кайтып китте.