27.04.2018 Әдәбият

"Матбугат.ру"ның якын дусты һәм авторы Зиннур Тимергалиевның яңа китабы дөнья күрде

Шушы көннәрдә якын дустыбыз Зиннур Тимергалиевның яңа китабы дөнья күрде. «Кичә яраттым» дип атала ул. Китап Татарстан китап нәшриятында басылган.

Вакыйф Нуриев язган кереш сүздә: «Әдәбиятта яңа исем булса да, Зиннур кинәт кенә язучы булып китмәгәндер. Миңа калса, ул тормышны элек-электән өйрәнеп, аның матурлыгын да, гыйбрәтләрен дә күңел дөньясына җыеп, вакыйгаларны. детальләрне хәтеренә сеңдереп яшәгән», — диелгән.

ТР Язучылар берлегенә кабул ителергә тиешле Зиннур Тимергалиевның бу җыентыгына повесть, бәяннар һәм хикәяләр кергән.

Зиннур Фирдәвес улы Тимергалиев 1974 елның 14 июлендә Татарстанның Арча районы Сөрде авылында туган.

1991 елда Яңа Кенәр авылында урта мәктәпне тәмамлый. 1992-1994 елларда Грузия Республикасында хәрби хезмәттә була.

1996-2008 елларда Татарстан Республикасы буенча Эчке эшләр министрлыгы органнарында хезмәт итә. 2008 елда, авырып китү сәбәпле, ялга озатыла.

Хәзерге вакытта Арча шәһәрендә яши. Өйләнгән, ике ул, бер кыз үстерәләр.

Зиннур Тимергалиев әдәби иҗат белән ун елдан артык шөгыльләнә. Чәчмә әсәрләре «Казан утлары», «Идел» журналларында, «Шәһри Казан» газетасында дөнья күрә.

Автор шулай ук шигырьләр, җырлар иҗат итә. «Алма кебек кызарма», «Ачуланма», «Мәхәббәт урамнары» һ.б. популяр җырлар авторы.

---
Матбугат.ру
№ --- | 27.04.2018