02.04.2018 Мәдәният

Нәфис сүз солтаны Айрат Арслановка 90 яшь булыр иде (ФОТО)

Быел 10 апрельдә күренекле нәфис сүз остасы, Россиянең һәм Татарстанның халык артисты, Габдулла Тукай исемендәге Дәүләт бүләге лауреаты Айрат Арслановның тууына 90 ел тула.

Айрат Арсланов Татар театр училищесын, А.Луначарский исемендәге Мәскәү театраль сәнгать институтының актерлык факультетын тәмамлый.

Хезмәт юлын Татарстан радиокомитетында диктор булып башлый, соңрак Г.Камал театрында актер булып эшли. 1961-1965 елларда – телевидение дикторы була. 1965 елдан Айрат Арсланов Г.Тукай исемендәге Татар дәүләт филармониясе артисты булып эшли башлый.1991 елдан алып лаеклы ялга киткәнче Филармониянең халык коллективлары режиссеры була.

Айрат Арсланов башкаруында Габдулла Тукай, Муса Җәлил, Гаяз Исхакый, Һади такташ, Хәсән Туфан, Сибгат Хәким һәм башка бик күп әдипләрнең үлемсез әсәрләре татарстан телевидениесенең «Алтын фонд»ында саклана.

Айрат Арслановның вафатыннан соң, аның исемен мәңгеләштерү максатында, күп кенә чаралар узды. Казаннның яңа микрорайоннарында урнашкан урамнарның берсенә артистның исеме бирелде, ул яшәгән йорт диварына истәлек билгесе куелды, истәлек кичәләре узды, Мәрҗәни мәчетендә рухына Коръән уку мәҗлесе оештырылды.

Татар дәүләт филармониясе музеенда Айрат Арсланов үзе һәм вафатыннан соң туганнары тапшырган экспонатлар саклана. Һәрберсендә артистның җылысы, рухы бар...

1. Арслановлар гаиләсе шәмдәле

2. Айрат Арсланов гаиләсе тапшырган радиола һәм артист башкаруында классик әсәр язмасы саклана торган пластинка

3. 1972 елгы афиша

4. А.Арслановка 1972 елда Донбас шахтерлары бүләк иткән каска

5. Айрат Арсланов кулы белән язылган мәкалә фрагменты

6. Айрат Арсланов үзе турындагы һәм үзе язган мәкаләләрнең кисемтәләрен махсус альбомнарга туплап барган

7. Айрат Арслановның концерт костюмы

8. Айрат Арслановның фотоаппараты

9. Замандашларының иҗатын тасвирлаган мәкаләләре, шигырьләр, фоторәсемнәр, Айрат Арслановның кайбер язмалары тупланган,1998 елда чыккан китап. Филармония директоры Кадим Нуруллинга култамга белән 2005 елның октябрендә тапшырылган. «Хөрмәтле Кадим Назыйрович! Сезнең милли сәнгатебез эшчәннәренә карата олы кайгырту күрсәтүегез, зур игътибарлы булуыгыз өчен мең рәхмәтләр әйтәсе килә. Бар яхшылыкларыгыз өчен тәшәккүрдән гаҗизбез. Иң изге теләкләр белән Айрат Арслан».