Татарстанның мәгариф министры БДИ тапшырганнан соң иң авыры ни булганын әйткән

Казанның 8 нче гимназиясенә 40лап кеше килгән иде. Сынауга энә күзен­нән үткә­реп керттеләр. Паспорт­сыз ки­лүчеләрне кире бордылар. Кат­нашучылар барысы да ме­талл  эзләгеч аша узды. Укучылардан аермалы буларак, әти-әни­ләрнең техник җайлан­ма­ларга,  видеокүзәтүләргә исе китмәде.

 

Алар кичә урыс теленнән имтихан тапшырды. Римма Ратникова әйтүенчә, бу телне камил белү  ышандыру, максатка ире­шү, карьера  ясау өчен дә ки­рәк. “Авызын ачса, авылы кү­ренә, дигән әйтем бар. Кеше бе­лән аралашканда аның белем дәрә­җәсе күренә”, – ди ул. Үзе исә V сыйныфта укучы улына урыс теле дәресләрен әзер­лә­шергә булыша.

 

Дәүләт Советының мәгариф, мәдәният, фән һәм милли мәсь­әләләр комитеты рәисе урынбасары Анастасия Исаева мәктәп елларында математика фәнен өнәп бетермәгән. Әмма шулай да яхшы укырга тырышкан. Ул күб­рәк гуманитар фәннәрне яраткан. Шуңа күрә дә ул, керә-ке­реш­кә, мондыйрак сорау бирде: имтихан математикадан тү­гелдер бит? “Мин – һөнәрем буенча педагог. Шуңа күрә мәгариф өлкәсендәге һәр яңалык минем өчен кызыклы. БДИ тирәсендә ыгы-зыгы, уйлап чыгарулар күп. Шуңа күрә үзем катнашып, БДИ­ның куркыныч түгел икәнлеген дәллилисем килде, – ди ул. – Беркайчан да шпаргалка язганым булмады. Бу яктан бик ялкау идем мин. Чөнки бер тапкыр язсаң, ияләшә башлыйсың. Кырын эш белән тотылуың да бар. Башкаларга да аны язарга киңәш итмим. Барлык фәннәрнең дә нигезен  белү кирәк.  Мәктәптә укыганда мо­ны аңлап бетермә­гән­без. Яшь барган саен, күбрәк аң­лыйсың”.

 

Татарстанның мәгариф һәм фән министры Рафис Борһа­нов­ның  имтиханда катнашу сәбәбе аңлашыла. “Имтиханга кагылышлы сорауларга ачыклык кертәсем килде. Барысын да үз күзләрем белән күргәч, язып карагач, әти-әниләр белән бер телдә сөйләшә  алачакмын. Әгәр безнең яктан ярдәм кирәк булса, булышырга әзербез, – ди министр. – Борчылам дисезме? Инде хәзер карт сөяккә берни куркыныч түгел”.

 

Камал театры артисты Ми­ләүшә Шәйхетдинованың да кү­ңеле тыныч. “Балалар күбрәк бор­чыла. Тестны ничек эшләя­чә­гем­не әйтә алмыйм. Югары балл туплау өчен ныклап әзер­ләнергә кирәк. Мәктәпне тәмам­лаганга 27 ел бит инде. Балабыз киләсе елда имтихан тапшырачак. Билгеле, репетиторсыз булмый. Металл эзләгеч аша кер­түне хупламыйм. Укучылар үз­ләренә карата ышаныч булмауны тоячак. Кибеткә кергәч, артымда каравылчы басып торса, аннан тизрәк чыгып китәм”, – ди артист.

 

Металл “капка” аша керү журналистлар өчен аеруча кызыклы тоелды. Рафис Борһановка аны ике тапкыр үтәргә туры килде. Беренчесендә чыелдаган тавыш ишетелде. Каеш тимере комачаулый икән. Министр аны салып керергә мәҗбүр булды.

 

Имтиханнан соң, әти-әниләр тәэсирләре белән уртаклашты. Рафис Борһанов өчен бланклар тутыру гына авыррак тоелган. Чөнки сызарга-буярга ярамый. Шакмакларга да дөрес итеп язасы. Министр фикеренчә, укучылар өчен мондый проблема булырга тиеш түгел. Чөнки алар мо­ңа алдан әзерләнә. “Шикле тоелган бер генә бирем булды. Аны­сын да дөрес яздым кебек. Оештыручылар барысына да ягымлы итеп аңлатты. Әгәр алдан әзерләнсәң, барысы да аңла­шыла”, – диде ул. Кыскасы, әти-әниләргә би­ремнәр авыр тоелмаган. Балалары уңышлы тапшырыр дип өмет­ләнәләр.