МОЗАФФАРИЯ МАҺРУЙ

(1873–1945)

Шагыйрә, педагог, журналист Маһруй Габделвәли кызы Мозаффария 1873 елда Казан губернасының Олы Торма авылында мулла гаиләсендә туа. Үз авылында белем алганнан соң, берникадәр вакыт шунда кыз балалар укыта. 1891 елда аны, унсигез яше тулар-тулмас, Казанның илле яшьлек Хөҗҗәтелислам муллага икенче хатынлыкка кияүгә бирәләр. Казанга күчеп килгәч тә, Маһруй ханым мөгаллимлек эшен дәвам иттерә – өендә кыз балалар укыта, аннан соң Фатиха Аитованың мәшһүр кызлар мәктәбендә мөдир булып эшли. Мәктәпне гимназия күләмендә белем бирә торган югарылыкка күтәрүгә зур хезмәт куя. Телләр өйрәнүгә, кул эше һөнәрләрен үзләштерүгә киң урын бирә.

Маһруй Мозаффариянең хатын-кыз тәрбиясенә багышланган «Нәсыйхәтнамә» исемле китабы 1901 елда Казанда басыла. 1906 еллардан башлап ул «Казан мөхбире», «Бәянелхак», «Әлислах», «Сибирия», «Тормыш» газеталарында, «Ак юл», «Сөембикә» журналларында языша, шигырьләрен, хикәя һәм мәкаләләрен бастыра.

Маһруй Мозаффария совет чорында да мәгариф өлкәсендәге эшчәнлеген дәвам иттерә. Ул 1945 елда Казанда вафат була.

ИҖАТЫ ТУРЫНДА

Өмет йолдызлары. – Казан: Татар. кит. нәшр., 1988. – 139 б.
Татар поэзиясе антологиясе. – 1 т. – Казан: Татар. кит. нәшр., 1992. – 503–504 б.