ГАББАСОВА РӘМЗИЯ

“Яңарыш” газетасының беренче саны 1991 елның мартында чыкты. Редакциядә 21 ел дәвамында дөнья күргән барлык саннар төпләнеп бара. Алар инде тау хәтле булган. “Яңарыш”ның бүгенге баш мөхәррире Габбасова Рәмзия Илдус кызы газетаның беренче елларда тупланган төпләмәсен алып, беренче санын күрсәтте.

Удмуртия татар иҗтимагый үзәге, аның беренче президенты Мәсгут Гаратуев тырышлыгы нәтиҗәсендә барлыкка килгән кечкенә генә биттән башлана газетаның тарихы. Беренче елда басма дүрт битле булып аена бер мәртәбә чыкты. Аннан соң ул дүрт битлек булып атна саен нәшер ителә башлады. Шуңа да бер төпләмәдә берничә елда чыккан саннар тупланган. Ә менә соңгы елларда газета әбүнәчеләргә зур күләмдә килә башлады. “Төпләмәсе дә елныкы-елга туплана”, дип ассызыклап үтте Рәмзия Габбасова.

«Бәллүр каләм» тагын безнеке

19 май – Татарстан Республикасы матбугат көнендә Казанның «Пирамида» мәдәни-күңел ачу комплексында республиканың «Бәллүр каләм» ХV журналистлык конкурсы йомгаклары игълан ителде. Әлеге конкурс 1998 елда гамәлгә куелып, быел унбишенче тапкыр уздырылды. Татарстан Республикасы Журналистлар берлеге рәисе Римма Ратникова сөйләвенчә, шушы дәвердә әлеге иҗади бәйгедә 2 меңләп кеше катнашкан. Алар арасында «Яңарыш»ыбыз да булып, 4 тапкыр (2002, 2003, 2006, 2007 еллар) «Бәллүр каләм»не яулаган иде. Быел «Яңарыш» - кабат җиңүче. Ул «Бәллүр каләм»гә 175 дәгъва кылучы арасында бил алышты һәм Россиянең төрле регионнарында дөнья күрүче татар газеталары өчен оештырылган «Туган тел» номинациясендә беренче урынга лаек дип табылды. Бу – үзләренә йөкләнгән бурычны намус белән башкаручы редакция хезмәткәрләренең генә түгел, ә «Яңарыш» газетасының иҗат мәйданында каләм чарлап, Удмуртия һәм Татарстан Язучылар берлекләре әгъзалары булуга ирешкән язучыларның, күп еллар дәвамында милли басмабыздан аерылмыйча, үзләренең көн кадагына сугучы язмалары, хәбәрләре белән газетабызның эчтәлеген баетучы актив хәбәрчеләрнең, газетаны халыкка таратуга зур өлеш кертүче милләттәшләребезнең, күпсанлы газета укучыларның, татар җәмәгатьчелегенең уртак шатлыгы. Әлбәттә, җиңү - күңелле күренеш, ләкин аның һәммәбезгә тагын да зуррак җаваплылык өстәвен дә онытмаска кирәк. Бүген, агымдагы елның икенче яртыеллыгы өчен язылу барган көннәрдә, бу аеруча мөһим. Газетага язылган һәр милләттәшебез «Яңарыш»ның яуланган үрләрне югалтмыйча милли рухи ихтыяҗларыбызны канәгатьләндерүче, гореф-гадәтләребез, телебез сагында торучы газета булып калуына үзеннән лаеклы өлеш кертәчәк. Алга таба да бергә һәм бердәм булып калыйк!
21 май 2012 ел

http://yanarysh.dsud.ru/