ТАТАР МАТБУГАТЫНЫҢ ИҢ “ТӘМЛЕСЕ”

Соңгы елларда татар телендә чыгучы газета-журналлар саны күзгә күренеп артты. Шәхси газеталар күбәйде. Араларында берничә саны гына чыгып калганнары да бар, әлбәттә. Аннан-моннан материал күчереп бастыру, күпсанлы “йолдызлар”, имеш-мимеш, аш-су һәм файдалы киңәшләр тирәсендә “әйләнү” белән мавыгучылары да күп. Шулай булса да татар матбугатының үсештә булуы шиксез. Исеме һәм абруе булган, дәүләт чыгара торган матбугат чараларында да бизәлеше һәм эчтәлекләре ягыннан үзгәрешләр күзгә чалына.

Газеталар чынлап та күп, аларның барысын да яздырып укып бару түгел, исемнәренә күнегергә дә өлгермисең. Хәзерге кызу заманда дөньядан калышмый мәгълүмат агышы артыннан ияреп барырга да кирәк. Үзем яңалыкларны Интернеттан карарга ияләндем. Кызганыч, моңа кадәр күпчелек татар газеталарының Бөтендөнья пәрәвезендә сәхифәләре йә бөтенләй юк, яисә алар вакытында тулыландырылмый иде. Баксаң, иң кәттә татар газеталары өчен бу эшне эшләүче кеше табылган икән. Укучыларга “Татарстан яшьләре”нең “Тамаша” сәхифәсен алып баручы, ә соңрак “Кәеф ничек?” газетасы мөхәррире буларак таныш журналист Данил Сәфәров. Күптән түгел ул татар матбугатында чыккан иң “тәмле” материалларны туплаган “Matbugat.ru” сайтын булдырды.

- Гадәттә газеталарда чыккан мәкаләләрнең бер-икесе генә аеруча игътибарга лаек, эксклюзив әйбер була. Газета мөхәррирләре белән сөйләштем тә, аларны Интернетка салырга булдым. Хәзер Matbugat.ru да егермегә якын басма матбугат чарасының иң шәп материалларын табарга була, - ди Данил.

Шунысын әйтергә кирәк, Данил үзе дә татар дөньясында ниләр булып ятканын белеп тора, сайтын беркемдә булмаган әңгәмәләр, яңалыклар белән һәрдаим баета. Иң кызыклы темалар астында су буе комментарийлар булыр – бусы инде сайтның популярлыгын аңлата. Бигрәк тә журналист халкы matbugat.ru ны үз итә. Кайбер күтәрелгән мәсьләләр кызу-кызу бәхәсләр уята. Интернетның тагын бер яхшы ягы – монда теләгән фикереңне язасың.

Татар матбугатының үсеше татар Интернеты тәрәккыяте белән үрелеп бара. Matbugat.ru сайты электрон татар газеталары арасында иң укыла торганы булып куяр бәлки.