Казахстанда Ваһапов фестивале гөрләде (ФОТО)

Рәшит Ваһапов исемендәге халыкара татар җыры фестиваленең чираттагы бәйрәме зур уңыш белән Казахстан башкаласы Астанада үтте. Ул фестивальнең 10 еллык юбилеена багышланды.

Фестиваль җитәкчесе Рифат Фәттахов, бәйрәм кунакларын сәламләп, әлеге зур мәдәни проектны оештыруда Татарстан җитәкчелегенең җитди өлешен ассызыклады.Фестиваль исеменә Казахстан Республикасының мәдәният министры Арыстанбек Мөхәмәдулы тәбрикләү юллады. Аны бәйрәмдә катнашучыларга министр урынбасары Әскәр Бурибаев ирештерде.

Дөньякүләм танылган казах җырчысы, СССРның халык артисткасы Бибигөл Түләгәнова чыгышы кайнар алкышларга күмелде, тамашачы бу бөек шәхесне аягүрә басып алкышлады. Бибигөл Түләгәнова Ваһапов фестивален Казахстан һәм Татарстан арасында мәдәни багланышларны ныгытучы күпер, дип бәяләде.

Мәшһүр артистка башкарган “Сарман” җырын тамашачы аеруча җылы кабул итте.

Концерт программасында фестиваль лауреатлары, яшь җырчылар Ришат Төхвәтуллин, Гөлсирин Абдуллина, Руслан Сәйфетдинов, шулай ук музыкантлар Алиса Лабзина, Рөстәм Рәхмәтуллин катнашты. Алар халык көйләрен, композиторларыбызның классик әсәрләрен, бүгенге эстрада үрнәкләрен тәкъдим итте.

Тамашачылар исеменнән чыгыш ясап, Татарстан Республикасының Казахстандагы тулы вәкаләтле вәкиле Айрат Хәсәнов, татар-башкорт мәдәни үзәкләренең “Идел” ассоциациясе президенты Рәфик Вәлиев Ваһапов фестиваленең зур хезмәтен билгеләп үттеләр, аның яшь лауреатлары уңышына, аларның югары профессиональ сәнгатенә соклану белдерделәр, киләчәктә шундый дәрәҗәле концертларның ешрак булуын теләделәр.

Казахстан Республикасында зур иҗтимагый һәм мәдәни вакыйга буларак кабул ителгән әлеге проектны Татарстан мәдәният министрлыгы, Татарстанның Казахстандагы тулы вәкаләтле вәкиллеге, Рәшит Ваһапов фонды, “Идел” ассоциациясе оештырды.

1

2

3

4

5

6

7

8

9

10

11