Олимпиададан соң без дә “кайттык” Сочидан. 4 елдан соң исәннәрне көтәдер Пхёнчхан!

Сочи Олимпиадасы турында кызыклы шигырь:

Унҗиде көн буе барды кышкы ярыш Сочида.
Әкрен башлап, триумф белән чыктык аның очына.

Кайчак әрнү, кайчак шатлык бирде олимпиада.
Телевизор аша көн дә без дә булдык бит анда.

Кышкы уеннарның саны йөзгә ике тулмаган.
Кемдер елады шатлыктан, ә кемдер егылудан.

Нәфис шууны карагач, биләп алды зур шатлык.
Совет заманы кайттымы – өч алтын медаль алдык.

Өч алтын медаль яулады шорт-тректа Виктор Ан.
Аның кебек оста чыкмас, булсаң син әгәр юан.

Тазаларның урыны бит, билгеле инде – хоккей.
Тик аларның уеныннан сыкрап чыкты елак көй.

Малкин, Овечкин, Дацюклар бик осталар барсы да.
Кабакка таба баралар, бирешмичә пас кына.

Кем аларны тыңлаталыр, кем аларга баш була?
“Ак Барс”ны илтсә генә, җиңәчәк Зиннәтулла.

Биатлоннан эстафета һәм чаңгы марафоны –
Шунда җиңгән җиде егет, күңелне шатландырды.

Утыз өч медаль яуладык, унөче аның алтыннан.
Беренче булды Россия медаль алу ягыннан.

Күренде бик еш Путин да, ышыкта – Медведевлар.
Көндез – Мәскәү, кичен – Сочи, арыды самолетлар.

Матур ачтык, матур яптык, фейерверклар да аттык.
Кайчагында борчылсак та, җанга юаныч таптык.

Кышкы Олимпиададан соң, без дә “кайттык” Сочидан.
Дүрт елдан соң исәннәрне көтәдер Пхёнчхан!