АМЕРИКА КИЛЕНЕ... IDELIA

Телевидение эшен ташлап җырчыга әйләнгән Idelia бөтенләйгә Америка Кушма Штатларына китәргә җыена. Сәбәпләрен үзеннән сорадык.

– Иделия, ни дип ташлыйсың безне?

– Укырга китәм. Америка вокалын өйрәнәсем килә. Бу күптәнге хыялым иде. Джаз стилен өйрәнә башладым. Шуны океан артында дәвам итәргә уйлыйм.

– Кайсы шәһәргә? Нинди уку йортына?

– Флорида штатының Орландо шәһәренә, Алла боерса. Ә уку йортлары буенча берничә вариантым бар.

– Ә укырга керә алмасаң?

– Анда түләп керәсе һәм укыйсы бит.

– Акча кайдан алдың? Уку кыйммәттер бит?

– Җыйдым. Банкта эшләдем, җырладым.

– Америкадагы кризистан курыкмыйсыңмы?

– Юк. Курыксам, җыенмаган булыр идем.

– Укырга керү бер хәл. Ә урнашу? Тору урынын ничек хәл итмәкче буласың? Анда сине кем көтеп торган?

– Әйтәсем килмәгән иде дә, әйтим инде. Мине анда туганнан туган апам һәм... булачак ирем көтә.

– Ничек инде? Кем ул?

– Композитор Мәсгудә Шәмсетдинованың улы Надир. Алар Америкага күптән күченде. Без Надир белән Казанда бергә укыдык. Ул миңа икенче сыйныфтан ук гашыйк икән!

– Ә син моны кайдан белдең?

– Ул 2006 елда кайткан иде Казанга. Ул чакта аның мәхәббәт сүзләрен чынлап кабул итмәдем. Инде быел да кайтты, шунда аңлаштык.

– Димәк, ул аклы-чуклы шарлар белән бизәлгән самолетлар кортежы белән синең кулыңны сорарга килергә тиеш?..

– Алай булса, күңелле булыр иде дә, әмма минем виза буенча без Америкада 90 көн эчендә рәсми рәвештә өйләнешергә тиеш.

– Америкага киткәч, инде башка татарча җырламаячаксыңмы?

– Җырларга уйлыйм. Казандагы саунд-продюсерым Альберт Зыятдинов белән хезмәттәшлегемне дәвам итмәкче булам.

– Синең сәхнә костюмнарың артык ачык. Мондый киемнәр белән американнарны бозып бетермәссеңме?

– Киемнәрне артык ачык дип саныйсыңмы?

– Белмим тагын...

– Мин күбрәк клубларда чыгыш ясыйм. Анда киенү рәвеше шундый. Ә эстрада сәхнәсендә чыгыш ясасам, башкача киенәм. Кайберәүләр бит әбиләр алдында чыгыш ясарга да ярым шәрә килеш чыга. Монысы инде зәвыксызлык билгесе. Минем һәр киемем җырлаган җырыма, аудиториямә туры килә дип уйлыйм.

– Әти-әниең синең иҗатыңны бик үк яратып бетерми иде. Америкага җыенуыңны ничек кабул иттеләр?

– Алар моңа шатландылар гына.

– Ник?

– Чөнки минем бәхетле булуымны телиләр.

– Инде күпме көтәселәре калды?

– Апрель-майга планлаштырам. Документларым шул вакытка әзер булырга тиеш.

– Саубуллашмый китмә алай да...

– Юк, әлбәттә. Киткәнче "Шәрык" яшьләр клубы белән берлектә саубуллашу кичәсе үткәрергә җыенабыз. Аның кайчан узасын минем җанатарларым ясаган www.idelia.ru сайтыннан белә алачаксыз.