Таныклыкны үзең белән йөртү кирәкме? (Сораштыру)

Хөкүмәт “тимер ат” хуҗаларына тагын бер “бүләк” ясамакчы. Сәламәтлек саклау министрлыгында машина йөртүгә комачаулык итүче чирләре булган кешеләрнең машина йөртү таныклыгын вакытлыча яраксыз дип табарга тәкъдим иткәннәр. Машина хуҗасы терелгәч, ул кабаттан үз көченә керә. Хәле тагын да авырайган очракта, машина йөртүчене таныклыктан бөтенләй мәхрүм итмәкчеләр.

Хәзерге вакытта моны бары тик суд аркылы гына эшләп була. “Ярамый” дигән чирләр исемлеге исә Россия Хөкүмәте тарафыннан расланачак.

Машина йөртүченең үзе белән сәламәтлек турында белешмә йөртүенә ничек карыйсыз? Ул нинди нәтиҗәгә китерер?

Рамил Хәйруллин, Рос­сия машина хуҗалары фе­дерациясенең Татарста­н­­дагы вәкиле:

– Бу яңалык­ның бер генә уңай ягын да, мәгънәсен дә күрмим. Хәзер медицина белешмәләренең ничек эш­ләнгәнлеген барыбыз да бик яхшы белә. Алар ярдәмендә кешенең 100 процент сәла­мәтме, түгелме икәнлеген ачык­лап булмый. Чөнки алар­ның күбесе сатып алынган. Сез әйткән яңалык та риш­вәтчелекнең артуына гына китерәчәк. Моңарчы сатып алганнар “акча төртү”ен дә­вам итәчәк, аларга яңалары да өстәләчәк. Белешмәләрнең яраклылык срогы чыга торган гадәте бар бит. Ә болай эшләгәндә, чират торасы да, нервыларыңны бетерәсе дә юк. Шуңа күрә иң элек медицина учреждениеләрендәге бу ямьсез күренешләрне бетерергә кирәк. Үзең белән белешмә йөртүне мәҗбүри итеп куйган очракта да, аларны бирү системасын үзгәр­тергә кирәк. Моңа өстәп, ун минутлык психологик тестлар кертсәләр дә яхшы булыр иде. Юкса хәзер рульгә психик тайпылышлы кешеләр дә утыра бит.

Гөлнара Вәлиуллина, Казанның 6 нчы шәһәр полик­линикасы терапевты:

– Сәламәтлек турында белеш­мә йөртүне 50 яшьтән өлкән­рәк булган кешеләргә генә мәҗбүри итеп куярга кирәк. Калганнарга кирәкми. Танык­лык алганда да, аннан соң да биш елга бер тапкыр машина йөртүчеләр җиренә җит­ке­реп медицина тикше­рүе үтеп тора. Ә сәламәтлеге начар булу аркасында кешене машина йөртү таныклыгыннан мәх­рүм итүгә кил­гәндә, бу – кеше хокукларын бозу. Чирне беркем дә үзе сорап алмый бит. Хәзер поликлиникаларда су буе чират. Бу яңалык үз кө­ченә керә калса, халык, го­мумән, табиблар янына йөрү­дән туктаячак.

Адилә Сәфәрова, ТНВ каналының “Зәвык” сә­хи­фәсе авторы:

– Күзе начар күрүче, кан басымы, йөрәк чирләре бе­лән интегүчеләр руль артына утырса, Аллам сакласын, фа­җигаләр килеп чыгар. Әйтик, кешенең кич белән күзе начар күрсә, ул юл кырыендагы кешене яисә юл аркылы чыгып баручы җәяү­лене күр­мәскә дә мөмкин. Шуңа күрә сәламәт­лек турында белешмә йөртүне кирәк саныйм. Шәх­сән үзем йөртер­гә риза. Әмма сәламәт­легемә ышанычым бул­маса, руль артына утырып та тормас идем. Башка кеше­ләрнең тормышын куркыныч астына кую – зур җавап­сызлык.

Илназ Гыйлаҗиев, ЮХИ­­ДИ инспекторы:

– Сәла­мәтлек турында мәҗбүри белешмә йөртүне бөтенләй кирәк тапмыйм. Таныклык алганда, булачак машина йөр­түчеләр җитди тик­шеренү уза бит инде. Шул җиткән. Күзе начар күрүче­ләргә ниндидер чикләүләр кертүне аңлап була әле. Ә менә калган чир­ләргә “бәй­ләнү” – бөтенләй башка сыймый торган хәл. Бу үзгәреш керә калса, кәгазь боткасы күбәеп, чиратлар тагын да озынаячак, халыкның ризасызлыгы артачак. Шул гына.