Юл буйларында – һәйкәлләр... (Сораштыру)

Юл буйларында һәйкәлләр урнаштыруны тыярга кирәк. Россия Дәүләт Думасы депутатлары әнә шундый фикердә. Алар бу хактагы закон проектын әзерли дә башлаган инде. Авторлар фикеренчә, мондый “зират”лар йөртүчеләрнең игътибарын читкә җәлеп итә, ә коммуналь хезмәткәрләргә исә юлларны чистартырга комачаулый.

Депутатлар мондый һәйкәл куючыларны 1,5 мең сумга штрафка тартырга тәкъдим итә. Россия Дәүләт Думасында закон проектын көз көне карарга ниятлиләр. Ә сезнең фикерегезчә, әлеге һәйкәлләр комачаулыймы?

Андрей Мухортиков,“Пробок.нет” эксперт үзәге җитәкчесе урынбасары:

– Миңа калса, якыннарга карата мәхәббәт, истәлек – һәр­кемнең йөрәгендә. Йә ул бөтенләй юк. Кабер ташла­рының зурлыгы, купшылыгы, юл чатында урнаштырылган һәйкәлләр генә ярдәм итә алмый. Ләкин Россиядә куркынычсызлыкка кагыла торган бүтән проблемалар чиктән ашкан вакытта Дәүләт Дума­сының монысы белән шө­гыль­ләнүе сәер хисләр калдыра. Димәк, алар йә чынбарлыктан шул кадәр ерак, йә гади халык тормышы алар өчен шуның кадәр генә мөһим. Берәр нәр­сәне тыярга телә­сәләр, өченче рәттән сулга борылышларны тыйсыннар. Хәрәкәтнең шундый булуы аркасында елына йөз­ләгән кеше һәлак була. Менә кайда проблема. Ә һәй­кәлләр аркасында үлүчеләр бармы? Монысы исбатланмаган.

Фидаил Яшкин,йөк машинасында ерак юлларга йөрүче:

– Әлеге һәйкәлләр игътибарлырак булырга этәр­ми, киресенчә, нервларымны какшата. Тәүлекләр буе юлда барырга туры килә, болай да авыр, тагын чакрым саен та­кыя­лар, ташлар, һәй­кәлләр урнаштырылган. Өйгә исән-сау кайтып җитә алсам ярар иде, дип кайгыра баш­лыйсың, фикер чуала. Юлда һәлак булган кешенең туганнары өчен, билгеле, әлеге һәйкәл – истәлек. Алар­­ның да күңелләрен тө­шерәсе килми, билгеле. Лә­кин дәүләт исәннәрне кайгыртырга тиеш. Шуңа депу­тат­лар­ның тәкъдимен хуплыйм. Шунысы бар: һәй­кәлләр саны артмасын өчен, юллар сыйфатын да кайгыртырга кирәк.

Резеда Ганиева,психолог:

– Йөртүчеләрнең бер өлеше, әлеге һәйкәлләрне күреп, куркыныч урында тизлеген киметә, игътибарлырак булыра тырыша. Икенчеләре, киресенчә, көннән-көн күбәя торган әлеге билгеләрдән канәгать түгел. Галимнәр тарафыннан шунысы исбатланган: мондый һәйкәлләр һәлак булган кешенең туганнарына бер дә ярдәм итми. Таш, чә­чәкләр куеп, кеше әлеге фа­җигане кат-кат кичерә, оныта алмый, йөрәгендәге яра­лар яңара. Бу яктан караганда, һәйкәлләрне алып ташларга кирәк.

Виталий Логинов,“Ашыгыч ярдәм” машинасы йөртүчесе:

– Һәйкәлләр куелган юлларга чыгарга куркалар икән, өйдә утырсыннар. Трассаның чә­чәкләр, ташлар куелмаган өле­ше буенча барганда, йөр­тү­че­ләр як-ягына каранмый, бер­нигә дә игътибар итмиме әллә? Кара бу машинага! Көнба­гышлар өлгереп килә икән! Юлда йөртүченең игътибарын җәлеп итәрдәй нәрсәләр бик күп. Аларны да алып атарга кирәк алайса!