Горурланасызмы, гарьләнәсезме? (Сораштыру)

Илебез белән горурланабыз! Бөтенроссия җәмәгатьчелек фикерен өйрәнү үзәге (ВЦИОМ) үткәргән сораштыру барышында халыкның 85 проценты әнә шулай дип белдергән. Респондентларның 77 проценты илнең спорттагы уңышлары, 75 проценты мәдәният һәм сәнгать, 63 проценты армия, 60 проценты илнең фән һәм галимнәре, 50 проценты Россиянең дөньяда тоткан урыны белән горурлана икән.

Шул ук вакытта россиялеләрнең нибары 14 проценты гына илдәге яшәү дәрәҗәсеннән канәгать. Өч ел элек шундый ук сораштыру вакытында 64 проценты россиялеләрнең үз иле өчен оялуын белдергән. Респондентларның 25 проценты моның төп сәбәбен – түбән хезмәт хакы, социаль тигезсезлек, 6 проценты – илнең спорт өлкәсендәге уңышсызлыклары, 5 проценты – эшсезлек, 4әр проценты – икътисадның көчсезлеге һәм хөкүмәтнең начар эшләве, 3 проценты ришвәтчелек, илдәге законнарның эшләмәве, эчкечелек, бәяләрнең югары булуы белән аңлаткан. Ә сез илнең кайсы уңышы белән аеруча горурланасыз? Аның нинди уңышсызлыгы өчен оят булырга тиеш?

Ильяс Галимов,милли көрәш буенча атказанган спорт остасы:

– Мин Россиядә яшәвем белән горурланам. Ләкин аяк терәп горурланам дип әйтерлек әйберләр Рос­сия­нең үзендә юк әле­гә. Ришвәтчелек, хезмәт хак­ла­рының түбән булуы, ата-аналарның балаларын таш­лап калдыруы, алар­ның ятим үсүе өчен оят миңа. Ә инде авыл җирен­дә яшәп эшләүчеләргә хез­мәт хакы түләнмәү аеруча аяныч. Кулына 1000 сум хез­мәт хакы да алмаган ке­шеләрне беләм. Күптән тү­гел Казанда узган Универсиаданы исә республикабыз өчен зур уңыш дип саныйм. Республикабызның Президенты белән дә горурланам. Соңгы елларда юллар күзгә күренеп яхшырды, яшьләргә күпләп фатирлар бирелде. Монда аның өлеше зур.

Илназ Гарипов,җырчы:

– Мин илебезнең табигый байлыкларга, фән дә­рәҗәсенең югары булуына куанам, аның акыллы һәм сәләтле халкына сокланам. Илебезнең иң зур территория биләве белән горурланам, ә менә 26 яшемә җи­теп, көне-төне эшләп тә, үземә йорт төзергә бер җир кисәге дә таба алмаганым өчен миңа безнең ил өчен азрак оят.

Роза Хисамова,татар теле һәм әдәбияты укытучысы:

– Безнең илдә минималь хезмәт хакы егермемеңнән артык дип язып та хәерчеләр күплеге, “түләү­сез” медицинаның сүздә генә булуы, акыллы бала­ларның уку йортларына керә алмавы, авылларга игътибар кимүе өчен миңа бик оят. Илебезнең зурлыгы, көче, күпмилләтле халкы һәм, иң мөһиме, Рос­сиянең тынычлыкка юнәл­де­релгән халыкара сәясәт алып баруы белән чын-чынлап горурланам. Без­нең халыкны сугышлардан сакларга кирәк. Ул болай да күп күргән инде.

Лилия Галимова,журналистика факультеты студенты:

– Безнең илдәге кимче­лекләр нигездә кешеләр­нең әдәпсезлегенә барып тоташа. Экология һәм мә­дәният елы дип игълан итәләр дә кычкырып торган исем кала, ә мәдәният ни алга, ни артка бармый. Безнең илдә кеше гомере дә бер тиен тормый. Медицина өлкәсендә тәртип бул­мавы, кешене санга сук­­маулары, электрон чират кертеп, кайбер табиб­ларның талонсыз авыруларны кабул итмәүләре, медикамент җитмәү, рецепт алу өчен чират тору, аннан даруны атналап-айлап көтү, бар җирдә дә акча чыгару да ил өчен плюс түгел. Уңай яклары да бар. Илебез соңгы елда спорт өлкәсендә зур үсеш алды. Социаль программа­ларның да кешеләргә булышуы зур плюс. Башка илләр белән чагыштырганда салымнар, торак-комму­наль хезмәтләрнең арзанлыгы, төрле милләтләрнең бер-берсе белән дус яшәү­ләре дә хөрмәткә лаек. Шәхсән мин үзем илнең минусларына күз йомып, плюсларын гына күреп яшәргә тырышам.