Әзәрбайҗан югалган баллар өчен Динә Гариповагә диплом тапшырачак

Әзәрбайҗан Динә Гариповага аның “Евровидение”дәге чыгышы өчен үзләрендә күпме балл җыелуы язылган диплом әзерләгән. Бу хакта Әзербәйҗанның Россиядәге вәкиле Полад Бүлбүлуглы хәбәр иткән. “Әлеге дипломда Әзәрбайҗанның чыбыксыз элемтә операторлары аша Россия башкаручысына бирелгән тавышларның саны күрсәтелгән. Мин документны раслап аңа мөһер суктым. Моның белән Әзәрбайҗан үз сүзен әйтте дип саныйм”, – дип белдергән ул.

“Билгеле булганча, Динә Гарипова Татарстанда яши. Ә Әзәрбайҗан бу республика белән җылы мөнәсәбәттә. Бәйгене телевизордан караганда Әзәрбайҗаннан Россиягә бер тавыш та бирелмәвенә ышанмадым. Кызыксына торгач шул мәгълүм булды: “Azercell” чыбыксыз элемтә операторы аша гына да Динә Гарипова өчен 1 мең 700дән артык тавыш бирелгән. Миңа бәйгедә тавышларны ничек санаулары аңлашылмый. Ничек инде 5-6 кешедән торган жюри 2-3 мең тавышны юкка чыгара алсын? Бәйгедә тавыш санау системасы дөрес түгел”, – дигән Полад Бүлбүлуглы.

Исегезгә төшерәбез, “Евровидение” бәйгесендә Россия данын яклаган татар кызы Динә Гарипова өчен Әзәрбайҗан бер балл да бирмәгән дип исәпләнде. Ә Россия тамашачысы Әзәрбайҗан җырчысы чыгышын 12 балл белән бәяләгән иде.