Әлмәт театры Төркиядә узган Халыкара сәнгать фестиваленнән кайтты (ФОТО)

Әлмәт драма театры Төркиянең Мәрмәрис шәһәрендә узган Халыкара сәнгать фестиваленнән кайтты. Артистлар фестивальдә М.Лермонтовның “Гашыйк Кәриб” спектакле белән катнашты. “Гашыйк Кәриб”нең бу алтынчы фестивале. Режиссер Искәндәр Сакаев куйган ярлы җырчы Кәриб хакындагы мәхәббәт легендасы Әлмәт театры тарихында иң күп фестивальләрдә катнашкан спектакль.

Театрның төп чыгышы Мәрмәрис шәһәрендәге амфитеатрда була. 1000 кешелек урынлы театрда артистлар чыгышларын концерт белән башлап җибәрәләр. Тамашачылар арасында Голландия, Англия, Германия илләреннән килгән туристлар була. Артистлар фестиваль программасы кысаларында Кытайның Мәрмәрис белән тугандаш шәһәрнең паркын ачу тантанасында катнаша. Төркиянең иң матур шәһәре Турунч амфитеатрында туристлар өчен уйный. Шәһәр мэры соравы белән, махсус шәһәр халкы өчен, аерым чыгыш ясый. Бу фестиваль халыкларны бер-берсенең сәнгате белән таныштыру максатыннан оештырыла. Яшәгән урында театр артистлары татар халкының бию-җырлары белән таныштыра, шулай ук башка милләтләр дә чыгыш ясый. Фестиваль катнашучылар һәм туристлар өчен менә шундый иҗади аралашу, танышу мөмкинлеге бирә. 

1

2

3

4

5

6

7

8

9

10