110 КИЛОЛЫ КАР КЫЗЫ

Хатын-кызга әз генә ит куна башласа, ул тәмам хафага төшә: ач йөри, тузга язмаган диеталарга утыра, үз гәүдәсеннән ояла башлый. Аеруча яшь кызлар шулай. Бу язманы укыгач, үзен таза дип санаучы кызлар үз-үзләрен ярата башласын, гәүдәләре белән "дуслашсын" иде дим.

Яңа елга 3-4 атна калды. Корпоратив бәйрәмнәр чорына аяк басабыз. Кыш бабай белән Кар кызы туйдырды. Ел саен шул бер үк образлар – картаймыйлар да, яшәрмиләр дә. Әмма быел Казанда үзенчәлекле Кар кызы барлыкка килде – 110 килолы! Бу образны уйлап тапкан һәм аның эченә яшеренгән Ольга Асманова ябык фәкыйрегез белән барысын да уртага салып сөйләште.

– Оля, Мәскәүдә "Шоу толстушек" дигән тамашалар бик популяр дип беләм. Димәк, бу гарасат Казанга да килеп җитте?

– Әйе, Казанда берничә шундый проект бар. Моңарчы "Милашки" дигән төркемдә өч кыз биедек.

– Барыгыз да "сөбханалла"мы?

– Әйе. Өчебез дә 100 килодан артык идек. Яхшы биедек, пластика шәп иде. Безнең кебек гәүдәле кешеләр арасында яхшы пластикалы кешене табу авыр.

– Ә ничек табыштыгыз соң сез? "Авырлыгы 100 килодан артык булган биючеләр кирәк" дип игълан биреп булмый бит инде?

– Нәкъ шундый игълан бирдем. Бер биючебез шулай табылды. Шалтыратучылар күп булды. Таза кызлар шактый, әмма үз тәннәреннән оялмаучылар сирәк. Бии белүчеләрне табу тагын да авыррак.

– Сезнең жанрда чыгыш ясар өчен тагын нинди сыйфатлар кирәк?

– Беренче чиратта комплекслар булмаска тиеш. Сәхнәдә үз-үзеңне матур тоту, көчле энергетикага ия булу, бии белү, матур сөйләшү шулай ук бик мөһим.

– Ә сөйләшә белү нәрсәгә?

– Чөнки безнең интерактив тамаша, халык белән эшлибез.

– Яшь буенча таләпләр бармы?

– Бар. 20 яшькә кадәрле хатын-кызлар, гадәттә, эшкә җитди карамый. Алар белән эшләве авыррак. Ә 40тан соң инде таза хатын бик үк матур түгелдер. Игълан биргәндә яшь таләпләрен күрсәтмичә ялгыштым. 50-60 яшьлек бик күп апалар шалтыратты.

– Сезнең яшегезне сорарга оялып торам...

– Оялма. 32 миңа.

– Тамашагызны халык ничек кабул итә?

– 95 процент "О-о!" дип кычкырып каршы ала, балалар кебек шатланалар. Ирләрнең иң беренче сүзе: "Менә бу күкрәкләр, ичмасам!" (8нче размер турында сүз бара – Д.С.). Аннары "запчастьләр" буенча сүтеп җыялар. Ә 5 процент чамасы бөтенләй кабул итә алмый: "Безгә тазалар кирәкми", – дип кенә җибәрә.

– Хатын-кызлар ничек кабул итә?

– Күбесе ошата. Тазараклары, гадәттә, яныбызга килми калмый. "Моңарчы кешегә күренергә дә ояла идек, сезне күргәч, кушылып биисе килеп китте", – диләр.

– Ябыгып карау теләге бер дә юкмыни соң?

– Тазарганбыз икән – тазарганбыз инде, нишләтәсең! Үзебезнең арада бер әйтем йөри: "Әгәр авырлыгың 100 килодан арткан икән, ябыгырга тырышуның мәгънәсе юк, чөнки плюс-минус 5-10 кило – әллә бар, әллә юк". Икенче яктан, кеше күзгә ташланырга тиеш. Сәхнәгә тал чыбыгыдай кызлар чыга икән, бик хуп, бик яхшы, әмма андый кызлар белән сәхнә тулы. Ә без – тансык.

– Хәтта экзотика дип әйтер идем...

– Әйе. Беләсеңме, зур гәүдәле хатын-кызның ике юлы бар. Беренчесе – үз кимчелегеңне яшерергә омтылу, гәүдәне максималь рәвештә каплый торган киемнәр алу һәм ирләр игътибарыннан качу. Икенчесе – киресенчә, үзеңнең гадәттән тыш гәүдәңә акцент ясау, башкалардан аерылып тору, игътибар үзәгендә булу. Мин икенче юлны сайладым.

– Яңа елда Кар кызы булып эшләмәкче буласыз. Клиентлар булырмы?

– Әлбәттә. Аларны менеджерым таба. Бәйрәм оештыручы агентлыклар аша эшлибез.

– Ә фотодагы Кыш бабай ник таза түгел?

– Әйтәм бит, максатыбыз – стандарт булмаган образлар тудыру. Кыш бабай шулай ук гадәти түгел – яшь һәм ачык чырайлы. Исеме – Данил.

– Ничек?

– Данил... Ул төнге клубта биюче.

– Яңа ел бик тиз узар. Аннары нишләрсез?

– Эшсез утырырга исәп юк. Балалар өчен "Смешарики" дигән яңа проектка тотынырга исәп.

– Телевидениедә эшләп карарга тәкъдим булмадымы?

– Юк, ул өлкәдәге кешеләр белән элемтәм юк.

– Ә белемегез нинди?

– Рус теле һәм әдәбияты укытучысы мин. Сәхнәне яратуым да мәктәп елларыннан, дөресрәге, лагерьлардан килә.

– Стриптиз биисегез килмиме?

– Юк, минем жанр күбрәк клоунадага тартым. Ә элеккеге коллективтан бер дус кызым стриптиз бии.

– Ул да 100нең теге ягындамы?

– Әлбәттә!

– Үзләрен таза дип санаучы кызларга нәрсә киңәш итәр идегез?

– Таза булуның бер генә авырлыгын күрәм. Кием табып булмый. Зур размерлы киемнәрнең күпчелеге 50-60 яшьлекләр өчен. Яшьләр аны кимәячәк. Ә бәяләре гадәти киемнәрдән 3-4 тапкыр кыйммәтрәк. Әйтерсең, анда 3-4 тапкыр күбрәк тукыма киткән. Карьера булдыру да, гаилә бәхете дә тазалыкка карамый, кызлар. Мин, мәсәлән, бик бәхетле хатын-кыз, хатын һәм әни кеше. Мин элек үз гәүдәмнән ояла идем. Әмма ирем мине нинди бар, шулай яратты. "Әйдә, ябыгып карыйм", – дигәч: "Бу турыда уйлама да!" – диде. 2 һәм 5 яшьлек ике малай үстерәбез. Балалар өстемә менеп яткач: "Әни, син шундый йомшак", – дип шатланышалар. Таза булуның бер авырлыгын да күрмим...

P.S. 110 килолы Кар кызына күлмәк тектерү 20 мең сумга төшкән.