Универсиада кунаклары да фәрештә түгел!

Театр гардеробтан башланган кебек үк, һәр шәһәр вокзалдан яисә аэропорттан башлана, минемчә. Казан - татарның мәркәзе дип күкрәк кагырга яратабыз яратуын. Тырыш, чиста, кунакчыл дигән сыйфатларны да үзебезне мактаганда бик теләп кулланабыз. Ә чынлыкта хәлләр шулаймы соң?

Күпләр Казанда төрле милләт вәкилләре гомер кичерә дип әйтер. Ләкин шулай булса да, Казан дигәндә, һәр кеше татар дигән милләтне күздә тотуына шигем юк.

Беренче карашка кечкенә генә тоелган мәсьәлә шәһәр депутатларының көнүзәк проблемасына әверелде. Ул да булса - бәдрәф. Оялып, яшереп торасы түгел, Казанда урамнарында алар юк дәрәҗәсендә. Хәер, соңгы арада Бауман шикелле үзәк урамнарга биобәдрәфләр урнаштырыла башлады. Аларның тиешле-тиешсез, җайлы-җайсыз урыннарга куелуы турында телевидение каналларында да сүз куертулар булгалап алды.

Ә бүген мин игътибарны вокзал, бигрәк тә Казаныбызның үзәгенә урнашкан автовокзалына юнәлтәсе булдым. Әлеге вокзал аша йөри башлавыма егерме еллап вакыт узгандыр, шәт. Ә менә андагы уңайлыклар сугыш чоры вакытындагын хәтерләтә. Беренчедән, вокзал эчендә йомышханә, гомумән, юк. Аңа фәкать вокзалның икенче ягыннан гына, урам аша эләгергә мөмкин. Исле, пычрак, хәтта кул юу өчен куелган су кранынының эшләмәве – кыргыйлык....

Сәфәр юлы автовокзал аша узучылар игътибар итә торгандыр: бәдрәф ишеге янында акча җыеп торучы апаның гадәттә иңе-буе бер тигез була. Ун тәнкәсен түләп кергән йомышханәнең бернинди санитария таләпләренә туры килмәгәненә җен ачуың чыгып, “ни өчен генә акча җыеп утырасыз, кул юарга суыгыз гына да юк бит” дигән сүзгә, ул, гадәттә, җилкә генә сикертә. Мөгаен, кысталганнарның шелтәсенә күнегеп беткәндер. “Администрациягә фикерегезне белдерә аласыз!» - дип кенә җибәрә ул.

Ә администрация исә, бәдрәф кебек “вак” мәсьәлә дәрәҗәсенә төшми, ахыры. Аларның Универсиада үткәрәсе бар ич! Кая монда...

Ләкин шуны белик: дөньякүләм зур чарага фәрештәләр түгел, тере кешеләр җыелачак, аларны ашату-эчертүдән тыш җайлы, заманча, чиста бәдрәфләр белән дә тәэмин итәргә тиешле бит инде без, җәмәгать!