Кыш «кызу» булырга охшаган...

Сентябрь аеннан торак-коммуналь хезмәтләре өчен тарифлар янәдән артты. Көз башында бу әле сүздә генә булса, октябрь уртасында, хисап кәгазьләре алу белән, Татарстан халкы ачы чынбарлыкны тулы мәгънәсендә үз күзе белән күрә алды. Җылылык кына түгел, суга да бәя алтын кыйммәтенә җиткән икән, ләбаса!

Халыкны иң борчыганы — товар җитештерүчеләрнең җылылык предприятиеләре чыгымнарын капламый башлавы. Катнаш субсидия юк ителү физик затлар өчен бәяләр үсү белән тәмамланды. Моңарчы «Таттеплосбыт» җылылыкны  600,3 сумнан җибәргән булса, хәзер аның 1 гигакалориясе 1271 сум тора.

Зуррак мәйдандагы фатирларны җылыту өчен нәкъ менә шушы күләмдә энергия тотыла да. Җылылыкка сезонлы үсешне исәпкә алсак, Казан, Чаллы, Түбән Кама (шулай ук Апанас, Красноключинск авыл җирлекләре), Зәй һәм Уруссуда яшәүчеләр фактура исәбен тыныч күңел белән карый алмас шикелле.

Субсидия «Казэнерго» кулланучыларына да бар

«Казаэнерго» оешмасы кулланучыларының исә «алтын бәяләргә» инде күптән исе китми. Алар инде шактый вакыт дәвамында җылылык өчен икеләтә зур сумма түләп килде. Сентябрь аеннан Казанда яшәүчеләрнең бер өлеше җылылыкны 1324,42 сумга (1 гигакалориясен) алачак. Республика Тарифлар комитетының бу мәсьәлә буенча белгече, «Татэнергосбыт» кулланучыларына кебек үк, «Казэнерго»дан җылылык алучыларга да субсидияләр каралганын хәбәр итте. «Бәя үсешен бераз йомшарта торган субсидия, тарифлар зурлыгы сәбәпле, аларга элек тә бар иде», - дип ассызыклады комитет вәкиле.

Сентябрь аенда күрсәтелгән хезмәтләр өчен фактура исәбен алгач, күп кеше иң ахыргы сумманың шактый түгәрәкләнеп киткәнен сизгәндер. Чөнки гел җылылык турында уйлап, җылы һәм салкын су, электр энергиясенә дә бәя үскәнен сизми калганбыз икән! Татарстан тарифлар комитеты раслаган тариф нигезендә бер киловатт-сәгатьнең 2 сум 43 тиеннән 2 сум 57 тиенгә кадәр кыйммәтләнүе мәгълүм.

Суның һәр тамчысы кадерле!

Салкын су кубометры августта республика буенча уртача 19,3 сум торса, көздән ул 20,9 сумга кадәр «сикерде». Канализацияләү бәясе дә, кулланылган су күләменнән чыгып, сентябрьдән инде 13,8 сум тора. Салкын суга бәя фактура исәбендә сентябрьдән ике графада күрсәтелә башлады. Берсе фатирда тотылган су өчен түләү булса, икенчесендә — йортта суга тотылган чыгымнарның бер өлешен (ОДН) язалар. Әйтик, кайдадыр торба тишелеп, су агып ята икән, ул чыгымнар бу йортта яшәүчеләр җилкәсенә төшә.

Нәрсә-нәрсә, халыкка быел чыннан да бик эссе булыр, ахрысы. Җылылыкның үзенә генә түгел, җылы суга да зур бәя куелган. Энергияне җибәрүгә чыгымнар үскәч, суны җылытуга да тарифлар бер урында калмас бит.  Өстәвенә, тарифка салкын су бәясе дә керә. Шуңа да Татарстанның төрле районнарында җылы суның куб метры хәзер, икеләтә артып, 94-120 сумга төшә.