Сүз боткасына чуммыйча

Авыл, мәктәп, кадрлар, татар теле темалары соңгы вакытта иң спекулятив темаларга әверелде. Кем ничек тели, шулайга ишеп сүз диңгезен аткыры-тоткыры кистереп, үзләренә дивиденд эзли һәм... таба.

Хәер, ләкин авыл, мәктәп, кадрлар һәм татар теле бу кайнаулардан файда күрми. Ник дисезме? Чөнки икейөзлелек һәм сәясәттә киң кулланыш алган “система двойных стандартов” дигән нәрсә кагылган сорауларда колач җәя.

 Сүз боткасына чумасы килми, бер мисал гына алыйк.

 Татар теле. “Туган телебезне сакларга кирәк, аның өчен белгечләр әзерләргә, якларга, чөнки тик алар сыйфатлы белем бирерләр”, - дип чаң сугалар татар телен саклауга багышланган, рус телендә узган җитәкчеләр ки-ңәшмәләрендә. Әмма, ишектән чыккач барысы да онытылган очраклар бар. Шул ук җитәкче дипломлы татар теле белгеченең дәрес-сәгатьләрен тартып алып бүлә-яра, нинди дә булса свитадагы “заушникка” тотып торган тәлинкәсенә авыз итәргә китереп сала, ә ул нишләргә дә белми, эшлисе дә килми.

 Шул мизгелдән белгечләр, ата-ана арасында ачу уяна. Ничек уянмасын, гине... стоматолог урынына сантехник хезмәт күрсәткәч. Мондый кыштыр-мыштыр-ларны күзәтеп торганчы бар һәм киләчәк белгечләр бу мәктәпкә кул селти, ә балалар әти-әниләре ярдәмендә бүтән уку йортына күчә.

 Нәтиҗәдә нәрсә күрәбез? Кадрлар китеп бара, балалар саны кими. Мәктәп абруен төшереп ел саен сират күперен чыга – әллә ябалар, әллә юк. Япсалар – авыл белән саубуллашырга җыенырга вакыт инде. Ә бит нәрсәдән бу бәрәбара тотынды?

 Әлбәттә, бу уйлану берьяклы гына, катлаулы проблеманың меңнән бер өлешен чагылдыра, әмма...