Милләтебезнең үз онлайн-мәктәбе була

“ТатарТаун” дип аталган онлайн-мәктәп проектын “EF Education First” компаниясе республиканың татар теле белгечләре белән берлектә эшлиячәк. Бу хакта Татарстан Президенты Рөстәм Миңнехановның бүген әлеге компания җитәкчелеге белән очрашуында килешенде.

EF Education First ширкәте Казанда узачак җәйге Универсиаданың партнеры да булачак, дип искәртә “Татар-информ” агентлыгы. Моны күздә тоткан беркетмә июль аенда имзаланган иде. Май аенда исә башкалабызда EF-ның мәгариф үзәге эшли башлады. Республиканың өч мең ярымлап укытучысы компаниянең укыту үзәкләрендә инглиз телен тирәнтен өйршәнү мөмкинлеген алган.

Казан мэриясе дә EF белән хезмәттәшлек хакында килешү имзалады. Якын арада исә Татарстанның Сәламәтлек саклау министрлыгы (1 меңгә якын кеше)  сайлап алган белгечләргә инглиз телен өйрәтүне күздә тоткан беркетмәгә дә кул куелачак.

“ТатарТаун” проектын тормышка ашырачак килешүне президент республика мөгаллимнәренең август киңәшмәсе барышында имзаларга тәкъдим итте. Рөстәм Миңнеханов искәртүенчә, бүген татарларның 30 проценты гына республикада яши, калганнары башка төбәкләрдә, дөньяның төрле илләрендә гомер кичерә. “Без татар телен сакларга омтылабыз. Онлайн-мәктәп теләге булган барлык кешегә татар телен өйрәнүдә ярдәмгә киләчәк”, – ди Миннеханов.

Хөкүмәт йортында узган очрашуда компаниянең техник директоры, укытуның интерактив системасын эшләүче Энио Омайя, “EF Corporate Language Learning Solutions” компаниясе президенты Кристоф Уилферт һ.б. катнашты.