ФӘЙРҮЗӘ ГАТАУЛЛИНА КИЯҮГӘ ЧЫКТЫ

“Яңа гасыр” каналындагы “Адымнар” тапшыруының алып баручысы Фәйрүзә Гатауллина 25 октябрь көнне кияүгә чыгып куйды. Вера Минкина оныгына. Без аны чын күңелдән котлап, әңгәмә корып алдык.

– Фәйрүзә, сөйлә, кемнәр кулына эләктең?

– Мин хәзер Гатауллина түгел инде. Мәҗитовага әйләндем. Ирем Руслан – геолог. Аңа 26 яшь. Нефтехимпроект институтында эшли. Ул Камал театры артисткасы Вера Минкинаның оныгы.

– Ничек танышып киттегез?

– Кызлар белән дискотекага барганда очраклы килеп чыкты ул. Машина туктаттык, анда ике егет утырган иде. Шуларның берсе Руслан. Арткы утыргычка без кереп утырдык. Егетләр сүзгә оста иделәр. Баксаң, алар да КДУны күптән түгел тәмамлаганнар икән. Ә без ул чакта 5нче курс студентлары. Уртак тема табылды. Төнге клубка җиткәнче сөйләшеп бардык. Килеп туктагач телефоннарны алмаштык. Соңыннан СМСлар языштык та шуннан китте очрашулар. Шулай итеп, 3 ел очрашканнан соң өйләнешергә уйладык.

– Туй кайда булды?

– Әмирхан урамындагы бер лицейның ашханәсендә. Ә язылышу Үзәк ЗАГСта.

– Бар да сез теләгәнчә булдымы?

– Әйе. Туйга әзерлек – мәшәкатьле чор. Бәйрәмнең бар нечкәлекләрен планлаштырырга, төптән уйларга кирәк. Үзебезгә дә, чакырган кунакларга да хуш килерлек булсын. Миңа иң ошаганы парлы бию булды. Туйга ике атна кала без Руслан белән бию түгәрәгенә язылдык. Хореограф безнең белән махсус шөгыльләнде. Өченче дәрестән ярыйсы гына чыга башлады. Ә туй барышында тамада яшьләр биюен игълан иткәч, өйрәнгәннәрнең барысын да кунакларга күрсәттек. Ошады бугай, әле бүген дә шалтыратып туйдан алган хис-кичерешләрен сөйлиләр.

– Кунаклар күп идеме?

– Чакырган 100 кешенең 90ы килде. Германиядән, Архангельскидан, Сахалиннан, Екатеринбургтан, Свердловскидан туганнар кайткан иде.

– Минем урында кыз кеше булса, туй күлмәгең матур идеме дип сорар иде...

– Әйе. Миңа туй күлмәге кию бик ошады. Тагын кияр идем. Кызганыч, ул бер көнлек кенә. Хәзер күлмәгем шаулап узган матур бер көннең искиткеч хатирәсе булып шкафта эленеп тора.