Такмаклар

(Сатирик әсәрләр конкурсы)

Безгә соң, япуннар кебек,

Туксанга җитү — кайда?!

...Эш тә, фатир да — юк:

Озак

Яшәүләрдән ни файда?!

***

Китап укучы аз булу

һич түгел каза...

Каза — Китап укымаучылар

үзләре... китап яза!

***

Кибетләргә кереп йөрдем,

Урадым базарлардан:

«Буш ботлары» үзебезнең

Кош ботларыннан арзан.

***

«Русия» диеп язылган

Самолет канатына.

Аек кеше юк сайларга

Дәүләт аппаратына.

***

Мафия «мерседес»ларда

«Эшләре» уңган була.

Милиция «УАЗ»икта

Аларны куган була.

***

Сандугач баласын юа

Гөл тамчылары белән;

Юк иттек совет властен

Юлбашчылары белән.

***

Хакимият бинасында

Җилферди ике әләм.

Халык белән көрәшүче

Демократларга — сәлам!

***

Туган илне сайламыйлар,

Данлыйк туган илләрне.

Таш бәйлик тә — суга салыйк

Такмакчы шагыйрьләрне!