Мөтеравылда китапханә ачылды

Моннан егерме еллар элек Мөтеравыл мәдәният йортты янып кара күмергә калган иде. Шул ук бинаның бер бүлмәсендә урнашкан авыл китапханәсе дә юкка чыкты ул көнне. Яңа клуб бинасы авылда бары тик 2006 елда ачылды. Әле авыл администрациясе башлыгы Хәсән Бәдретдинов инициативасы һәм тырышлыгы белән клубның бер бүлмәсендә китапханә дә булдырылды. Галина Идрисова китапханәче итеп билгеләнде.

- Хәсән Садретдинович күп тапкыр өлкә министрлыгына, район җитәкчеләренә мөрәҗәгать итте, хатлар язды. Һәм тырышлыгы юкка булмады. Сергач үзәк китапханәсеннән стеллажлар, ә Түбән Новгород, Мигино китапханәләреннән меңләп китаплар килде. Бүгенге көндә фондыбызда 10 мең китап. “Сельская новь”, “Мурзилка” журналларын да яздырып ала башладык. Көн саен унлап укучы килеп йөри, - ди Г.Идрисова.

Китапханә якты, чиста зур. Тик татар телендә китаплар бөтенләй юк икән, шунсы кызганыч. Ә укучылар сорый, аеруча өлкән яшьтәгеләр.

Әгәр татар авылларында яшәүчеләр безгә татар телендә китаплар бүләк итсә, бик рәхмәтле булыр идек, ди Галина ханым.

Халык элек-электән китапны изге дип атап саклаган, җыйган, күңелдән өйрәнгән. Коръәндә, белем ул оҗмахка ачкыч, диелгән. Китаплар үткәнне онытмаска, бүгенгенең кадерен белергә, киләчәкне күрергә өйрәтәләр.

Мөтеравылда яңа гына оешкан китапханә дә шул изге бурычын лаеклы үтәсен иде.