Намаз вакытлары нишләп төрле

Нәшриятчылар өчен мөселман календарьлары үтемле товар санала. Намаз вакытлары, кыска догалар, көн дә кирәк дини мәгълүмат урнаштырылганга алар укучылар арасында бик популяр. Әбиләр, бабайлар календарьларны ярты ел алдан алып куялар.

Бүгенге көндә дини китаплар сатыла торган кибетләрдә, базарларда мөселман календарьларының татар һәм рус телләрендә басылган күп төрлесен очратырга мөмкин. Ләкин күплек әле ул һәрвакытта да сыйфат билгесе түгел. Әйтик, шул бик матур итеп эшләнелгән, бай эчтәлекле, киң таралыш алган, кулланма китапка әйләнгән календарьларда намаз вакытларына кагылышлы хаталар китә икән. Шулай ук дини бәйрәмнәрнең көннәре төрлечә күрсәтелә. Белгәнебезчә, мөселманнар ел көннәрен хиҗри белән, ай торышына карап билгелиләр. Монда җирлеккә бәйле рәвештә намаз вакытларын дөрес күрсәтү сорала.

Календарьларга кагылышлы кимчелекләрне бетерү йөзеннән Диния нәзарәтенә аларны чыгаручыларны җыярга булганнар. 29 февральдә Татарстан мөфтие Илдус хәзрәт Фәйзнең мөселман календарьларын нәшер итүчеләр белән очрашуы көтелә.

Хәзер нәшриятчылар 2013 ел календарен әзерлиләр. Дин әһелләре белән киңәшеп, намаз вакытларын бер төрле итеп билгеләгәч, төрлелек юкка чыгар, дип ышана muslem.ru.