Йолдыз Шәрапова “Каен алмасы”

Танылган балалар шагыйрәсе Йолдыз (Йолдыз Әдип кызы Җамалетдинова-Шәрапова) 1962 елның 10 апрелендә Татарстанның Буа районы Яңа Тинчәле авылында туа. Казан дәүләт университетын тәмамлаганнан соң, гомере буе балалар матбугатында “Сабантуй” газетасында эшли.

Татарстан журналистларының  «Бәллүр каләм-2002” премиясе лауреаты. “Антенналы бәрәңге” дигән беренче китабы “1994нче ел китабы” конкурсында икенче урын алды. 2004 елда “Колаклы коймаклар” китабы өчен шагыйрә Татарстан Язучылар берлегенең А.Алиш исемендәге премиясенә лаек булды.

Йолдыз балалар күңелен нечкә тоеп иҗат итә. Йөгерек тел белән язылган шигырләрендә юмор, гыйбрәт, моңсулык табигый рәвештә үрелеп бара.