Әлмәт драма театрында бенефис

26 январьдә Әлмәт драма театрында Татарстанның атказанган артисты, Дамир Сираҗиев исемендәге премия лауреаты Рамил Минхановның юбилей кичәсе була.

Минханов Рамил 1961 елда Иркутск шәһәрендә туа. Әлмәт театрына эшкә ул 1980 елда урнаша, шофер, сәхнә эшчесе булып эшли. 1983 елда Казан театр училищесының курчак театры артисты әзерли торган бүлегенә укырга керә. 1987 елда укуын тәмамлый һәм Әлмәт театрында артист булып эшли башлый. Башта характерлы образларны оста башкаручы булып таныла. М.Кәримнең “Ай тотылган төндә”сендә Дивана, Ф.Бүләковның “Сөясеңме, сөймисеңме?”дә Абдулла, Аманулланың “Әлепле әртисләре”ндә Әхәт, Т.Миңнуллинның “Җанкисәккәем”ендә Исфан, “Диләфрүзгә дүрт кияү”ендә Амур рольләрен башкарып зур артистлык осталыгына ирешә. Аның уенына ачык бизәкләр, кайнар темперамент хас, ул яхшы пластикага ия, җырлый.

Шул еллар эчендә инде 60тан артык төрле образ иҗат ителгән. Мисалга, М.Фәйзинең “Ак калфак”ындагы Бакый, Ф.Садриевның “Безнең гомер язлары”ндагы Азат, Т.Миңнуллинның “Монда тудык, монда үстек”ендәге Надир, З.Исмәгыйловның “Кодача”дагы Яппар, М.Гыйләҗевнең “Оҗмах капкасы”ндагы Җиһангир, Д.Салиховның “Сәер кеше”дәге Нәсим, М.Лермонтовның “Гашыйк Кәриб”тәге Гаян ага, Арыслан, Дию, К.Гоцциның “Болан-Патша”дагы Дерамо, Ә.Еникиның “Тормыш корабы”ндагы Гасыйм һ.б. образлары. Рамил үзендә бүгенге заман театр сәхнәсенә хас бик күп сыйфатларны туплаган: музыкаль, матур җырлый һәм бии, яхшы пластикага ия. Бу осталыклары аңа төрле жанрда уңыш белән иҗат итәргә мөмкинлек бирә.

Рамилның 50 яшьлек юбилеена багышланган “Галиҗанәп Актер” исемле бәйрәм кичәсес 26 январьдә 18сәгать 30 минутта башлана. Кичәдә артист төрле елларда уйнаган спектакльләрдән өзекләр башкарачак.

1

2