Татарстанда авыл халкы вакытлы матбугатка казанлыларга караганда күбрәк языла

“Татарстан почтасы” федераль почта элемтәсе идарәсе 2012 елның беренче яртыеллыгына вакытлы матбугатка язылу нәтиҗәләрен игълан итте.

Бүген “Татарстан почтасы” федераль почта элемтәсе идарәсе 2012 елның беренче яртыеллыгына вакытлы матбугатка язылу нәтиҗәләрен игълан итте. Республика матбугат һәм гаммәви коммуникацияләр агентлыгында узган матбугат конференциясендә “Россия почтасы” федераль дәүләт унитар предприятиесе филиалы - “Татарстан почтасы” федераль почта элемтәсе идарәсенең коммерция эшчәнлеге директоры урынбасары Олег Баранов журналистларга әнә шул хакта хәбәр итте.

Аның сүзләренә караганда, 26 декабрьгә үзәк басмалар буенча гомуми тираж – 246 мең 709, республика басмалары буенча 833 мең 345 данә тәшкил иткән. Район гаммәви мәгълүмат чаралары буенча әлеге күрсәткеч 231 мең 902 данәгә җитә. О.Баранов билгеләп үткәнчә, матбугатка язылуның соңгы көннәрендә күрсәткечләр тагын артачак. Аның фараз итүенчә, соңгы вариантта саннар соңгы 7 ел дәвамында күзәтелгән күләмдә булачак.

Басмаларның структурасы мондый: матбугатка язылуның гомуми күләмендә үзәк басмаларның өлеше – 25, республика басмаларыныкы - 55-60, җирле басмаларның өлеше 14-18 процент тәшкил итә.

1 мең кешегә 373 данә газета-журнал туры килә. Бу сезонда ул 440 данә тәшкил итәчәк.

Вакытлы матбугатка язылуда Татарстанның Балтач, Әтнә, Буа һәм Саба районнары әйдәп бара, әлеге районнарда 1 мең кешегә 900 данәдән артык данә газета-журнал туры килә. Казан, Чаллы, Түбән Кама, Яшел Үзән, Алабуга шәһәрләрендә вакытлы матбугатны бик аз укыйлар.

2011 елда газета-журналларның 25 проценты – юридик, 75 проценты физик затларга туры килә. 2012 елның беренче яртыеллыгы нәтиҗәләре буенча вакытлы матбугатка язылучы юридик затларның саны кимегән (18,5 процент). Физик затлар исә, киресенчә, газета-журналларга күбрәк язылган (81,5 процент).