Нәфкать Нигъмәтуллин концертларыннан быел нәрсә көтәсе? (ФОТО, ВИДЕО)

Гадәттә, көзге эшләрне төгәлләп халкыбыз бу вакытта рухи азык туплый башлый. Көз ул эстрада, театр сәхнәсенең актив эш башы. Казанда көн саен диярлек концерт, шул уңайдан тамаша заллары гөрләп тора. Көзен, һәр елның ноябрендә моңлы җырчыбыз Нәфкать Нигъмәтуллин да тамашачыга өр-яңа концерт программасы тәкъдим итә. Быел да ул 21, 22, 23, 26, 27 ноябрьдә Казанның “Уникс” концертлар залында үтәчәк. Шактый мәшәкатьле чор булуга карамастан, Нәфкать абыйга берничә сорау яудырырга уйладык.

— Хәлләрегез ничек, Нәфкать абый?

— “Хәлләрең ничек дип сорама,” — дип җыр сүзләре белән җавап бирде ул. — Ел әйләнәсенә 150 гә якын концерт куябыз. Шуңа күрә яңа җырларыбыз юлда, гастрольдә вакытта өйрәнелеп, даими рәвештә репертуарга өстәлеп бара. Быел да шулай барлыкка килгән җырларны бик теләп тамашачыга тәкъдим итәбез. Әлбәттә, концерт булгач, җырлар гына түгел, коллективта да барлык жанрлар яңартыла. Минем төркем гел талантлы, яшь, тәртипле, матур кызлар һәм егетләрдән торды. Бергәләп Рәсәйнең төрле төбәкләрендә чыгыш ясыйбыз, Алар шулай үсә, халыкка таныла. Моның өчен төркемдә барлык шартлар да тудырылган. Шуның нәтиҗәседер, элек миндә эшләп киткән артистлар бүген үзләре үк аерым концерт куя. Бу мине куандыра.

— Эстрада сәнгате ул һәрвакыт үзгәреш, яңалык сорый. Быелгы төркемдә нинди үзгәрешләр бар?

— Бик талантлы музыкант, аранжировкалар ясаучы Рамил Гыйләҗетдинов җырларыма яңача җан өрде. Гитарачы җырчы егетебез Айнур Такиуллинны тамашачы Майкл Джексон белән тиңләп югары бәяли. Танылган скрипкачы Марат Аюповка эстрадада тиңнәр юк. Музыкаль яктан булышчым, талантлы музыкант, популяр җырлар авторы Альберт Галимуллин безнең төркемдә ун елга якын эшли. Сылу биючебез Резидә күз явын алырлык гүзәл. Алып баручы яшь юмор остасы Алмаз Мирзаяновның образлары эчкатыргыч. Казан концерты ул сәхнә бизәлеше, күз явын алырлык утлары һәм башка техник алымнар белән аерылып тора. Ә Казан тамашачысы алдында чыгыш ясау зур имтихан. Тәүге чыгышларымны үз итеп кабул иткән яраткан тамашачымны зур дулкынлану белән көтеп калам.  

1

2

3

4

5

6

7

8

9

10

11