“Музыкаль десант” – татар эстрадасында моңарчы булмаган мега шоу

Бу көнгә күп калмады. 8 октябрь көнне “Татнефть Арена” Боз сараена “Музыкаль десант” төшәчәк. 8 сәгатьтән дә озаграк дәвам итәчәк зур тамаша “Татар радиосы”ның 10 яшьлек туган көне уңаеннан уздырыла. Даими “десантчылар”:

Ландыш Нигъмәтҗанова, Ләйсән Гыймаева, Иркә, Раяз Фасыйхов, Илдар Әхмәтов, Мөнир Рахмаев, Илназ Баһ, DJ Радик, Алинә Бәширова, Зиннур, Илназ Сафиуллин, Ленар Сәйфиев, “Эссе”, Салават Миңнеханов кебек җырчылар белән бер кичтә татар сәхнәсенең мега-йолдызлары Айдар Галимов, Хәния Фәрхи, Зәйнәп Фәрхетдинова, Илсаф, Гүзәл Уразова, Зөлфәт Хәким, Венера Ганиева һ.б. кич буе тамашачының күңелен күрәчәк. 

Хәзер исә җырчыларның әлеге вакыйгага ничек әзерләнүен белик.

Мөнир Рахмаевка килгәндә аның сулышы капкан, көчкә тын ала. Ник дигәндә әле репетициядән чыгуы икән: “Бу чыннан да бик зур супер вакыйга булачак! Аны моңарчы булган концертлар белән чагыштырырлык та түгел. Бу бик үзенчәлекле бәйрәм булачак. Без монда Венера Ганиева белән “Ак каен”, Иркә белән “Җитә безгә бер сәгать”, Ландыш Нигъмәтҗанова белән “Сөю юк димә” кебек дуэтларны җырлаячакбыз. “Яшьлек тавышы”н һәм “Эх, күр әле!” дип аталган яңа җырымны башкрачакмын. Соңгы җырда “Калликорий” төркеменнән дүрт чибәр туташ миңа бию куярга ярдәм итәчәк. Хәзер алар белән биюне кабатлыйбыз. Минем исә образымда әллә ни үзгәреш булмас, тик тамашачыны яңа трюклар белән шаккатырырга планлаштырып йөрим.”

Алинә Шәрибҗанова:  “Бу “Музыкаль десант” чыннан да гаҗәеп булачак. Тамашачы бер чарага килә, ә ике бәйрәмне күрә. Монда концерт та, дискотека да булачак. Мин исә чыгышым белән тамашачыны шаккатырырга булдым. Әлеге чыгышны оештыручыларга үзем тәкъдим иттем, алар мине хуплады. Мин заманча татар клуб музыкасы үсешенә үземнән өлеш кертергә телим!”