Илнур Фәйзрахманов яңа эшкә кереште

Бүген "Яңа гасыр" телерадиокомпаниясендә генераль директорның радио буенча яңа урынбасарын коллективка тәкъдим иттеләр. Ул – барыбызга да таныш Фәйзрахманов Илнур Фәйзияздан улы. Яңа җитәкчене без дә шалтыратып котладык һәм берничә сорау бирдек.

- Илнур, яңа вазыйфаң белән котлыйм. Элеккеге җитәкчегез кая китте?

- Ул хәзер “Татарстан Яңа гасыр”ның Ветераннар шурасы рәисе.

- Ә ни өчен туп-туры урында җитәкчене алыштырырга булганнар икән?

- Бу сорау миңа түгел.

- Яңа вазыйфа белән үз өстеңә күпме проблема алганыңны чамалыйсыңмы?

- Әйе. Ремонт ягын карыйсы бар, техниканы яңартырга, бинабыз – тарихи мирас һ.б. һ.б. 

- Сау-бул, иҗат...

- Әйе, иҗатка 30 % вакыт кына калыр ахры.

- 30 % ул әле бик зур сан бу очракта.

- Әйе, әмма әле редакторлык эше дә үземдә калды әлегә.

- Яңа эшкә пионерларча әзерме соң?

- Әзер. Башта авыррак булыр инде ул. Аннан рәтләнер, дип уйлыйм.

- Хәер, яңа коллективка килмисең бит. Бар да үз белгәннәрең.

- Әйе, мин дә шулай дим. Яңа идеяләрем, проектларым күп. Бергәләп тормышка ашырырбыз, Алла боерса. Алдагы бер елга карт-бланш. Көчтән килгән бар эшне башкарасы.

- Эчеңдә нинди кичерешләр?

- Алда зур эшләр көткәнгә, бераз борчылу хисе бар. Ә болай... зур ышаныч хисе. Коллектив теләктәшлеге, телерадиокомпания җитәкчелеге хуплавы белән радио алдына куелган максатларга ирешербез дип ышанам.

- Максатларның берәрсен бүген үк ишетә алырбызмы?

- Беренчел планнар: тапшыруларның эчтәлеген, эфирга бирү рәвешен үзгәртергә, тапшыруларның дәвамлылыгын арттырып, тарихыбызга, милли тормышыбызга кагылышлыларын өстәргә ният. Алып баручылар сафы да яңарырга тиеш. Яңа тавышлар һәрвакыт кызыклы. Әмма тавыш белән бергә, эфирга чыгучының фикере дә булырга тиеш.

- Өелде сезгә соңгы вакыт ә. Яңа фатир алдыгыз, гаиләдә икенче балагыз – кызыгыз Сәлимә туды, хәзер менә яңа вазыйфа. Барысы да кыска вакыт эчендә. Шатланырга өлгерәсеңме?

- Чынлап та, быел җәй яңа фатирга күченү, ремонт мәшәкате белән узды. Инде эшләрне төгәлләп ун көнләп хәл алырга гына өлгердек, 8 сентябрьдә кызыбыз туды. Ул туган мизгелдә радионың бүгенгесе, киләчәге турында җитди сөйләшү бара иде. Гаиләдәге яңалыклар – шатлык билгеле. Ә менә эштәге яңа йөкләмәләр исә шатланудан бигрәк, уйланырга мәҗбүр итә.

- Алайса яңа туган кызың радиодагы яңарашларның бер символы кебек тә килеп чыга. Гаиләңә бәхет, эшеңдә уңышлар теләп калабыз.

- Рәхмәт!