Казан халкын яратасызмы?

Россиядә яшәүче һәр ун кешенең берсе Мәскәү халкын яратмый. “Ромир” тикшерү холдингы үткәргән сораштыру нәтиҗәләре әнә шуны күрсәткән. “Мәскәүдә яшәүчеләргә мөнәсәбәтегез нинди?” – дигән сорауга респондентларның 80 проценты: “Битараф”, – дип җавап кайтарган. Ил халкының 9 проценты исә мәскәүлеләрне ярата. Ә калганнар исә, ил башкаласында яшәүчеләрне сөймим, дип белдергән. Мәскәү халкын яратмаучыларның күбесе Себердә, Көньяк, Төньяк-Көнбатыш һәм Урал федераль округларында яши. Ә Татарстан халкы республика башкаласында яшәүчеләрне ярата микән?

Шамил ФӘРХЕТДИНОВ, Татарстанның атказанган артисты (Аксубай районы, Яңа Ибрай авылында туган):

– Казанга килгәч, шәһәргә ияләшкәнче, шәхси йортта яшә­дем. Беренче вакытта шә­һәр тормышы куркыта бит ул. Аллага шөкер, Казанга бик тиз ияләштем. Гомумән, миңа Казан, Мәскәү йә булмаса Санкт-Петербург халкы ошамый, дип әйтә алмыйм. Минемчә, бөтен кеше бертигез. Без, артистларга, бик күп шә­һәрләрдә булырга туры килә. Кая гына барсак та, горурланып, без Казаннан, Татарстаннан, дибез. Казан – Россиянең өченче башкаласы да бит әле. Аны ничек яратмаска мөмкин?!

Лилия НӘҖИПОВА, Яшел Үзән башкарма хакимиятенең бүлек белгече:

– Казанга терәлеп үк яшә­гәч, яратмый мөмкин түгел. Казаннан кала, Чаллы, Түбән Кама, Әлмәт кебек зур шәһәрләребез дә бар бит әле. Минемчә, әнә шул зур шәһәрләрдә яшәүчеләр бер-берсен өнәп бетерми. Моның сәбәбе бер-берсеннән көнлә­шү­дә­дер. Ә безнең алар каршына чыгып мактанырлыгыбыз юк. Шуңа күрә дә тыныч яшибез.

Дамир СӘМЕРХАНОВ, Минзәлә театры баш режиссеры:

– Без бер республикада яшибез бит. Кемнедер ярату-яратмау турында сүз дә булырга мөмкин түгел. Алар башкалада яши, без төбәктә көн кү­рергә мәҗбүр, дигән фикер искерде инде ул хәзер. Ник ди­гәндә, бүген интернет заманында яшибез. “Дөнья пәрә­везе” аша теләсә нинди эшне тиз арада башкарып чыгарга була. Мөмкинлекләре­без бертигез. Казанга атнасына ике тапкыр барып кайтабыз, шуңа күрә ул хакта уйлаган да юк.

Салават МИҢНЕХАНОВ, җырчы (Азнакай шәһәрендә туган):

– Башка шәһәрләрдән аермалы буларак, Казанга мөнә­сәбәтем үзенчәлекле дип әйтә алмыйм. Башкала халкына да тискәре карашта түгел. Минем­чә, казанлылар республиканың башка төбәкләрендә яшәүче­ләрдән бер ягы белән дә аерылмый. Шә­һәрдәге “бөке”ләр һәм бер подъездда яшәүче­ләрнең бер-берсен белмәве, ул гына да түгел, белергә дә теләмәве генә күңелгә ятмый, әлбәттә. Казан белән чагыштырганда, Азнакайны күбрәк яратам.

Рәшит ХАҖИЕВ, пенсионер (Әгерҗе районы):

– Шәһәрдә яшәүчеләрне гомумән аңламыйм. Бер көн түгел, бер сәгатьтә дә тыным кысыла башлый минем анда. Үзебезнең агач йортыбызга ни җитә! Кемдер Казанда яшәү­не артыграк күрә икән, яшәсен. Казанлыларга бер ачуым да юк. Кызганам мин шәһәр халкын...