Ризык хәсрәтеме, иман тынычлыгымы?

Матбугат.ру да “Акылга сыймаслык “хокуклар” язмасына карата язылган фикерләр арасында берсе кызыклы тоелды. Дөрес, ул бик примитив фикер, әмма материалистларның фикерләве нәкъ менә шул примитивлыгы белән кызыклы һәм гыйбрәтле дә инде.

“ЛәкЛәк” псевдонимлы берәү: “Әгәр дә кеше үз ризыгы белән туа икән, бу дөньяда нишләп ачлыктан шул хәтле кеше үлә? Ризыгы бар бит!” – дип куйган. Без, мөселманнар, бәхәстә дәлил кирәк булганда, Коръән һәм хәдисләргә мөрәҗәгать итәбез, әмма материалист белән дискуссия вакытында бу батмый. Шуңа күрә бу юлы да сорауга мантыйкый анализ һәм дөньяви фактлар белән җавап бирергә туры килә.

Тик шулай да башта бернәрсәне искәртергә туры ки­лә: баланың үз ризыгы белән тууы турындагы җөмлә ул исламнан, шуңа да ул югарыда искә алынган язмада мөселман гаиләләренә карата кулланылды да, нәкъ менә шулар бала туу сәбәпле муллыкларына зыян килер дип уйламыйлар, тынычлык һәм имин­лектә яшәүләрен дәвам итә­ләр. Ә менә материалист гаиләсендә, исә җан яралу фаҗига, бөлгенлек хакында баш ватып, стресс кичерү икән. Язмага карата әйтелгән мате­риалистларның фикерләре моны дәлилли. Бәхәс объекты булган җөмләгә килсәк, ул ана карынындагы яралгыга җан керү белән, Аллаһы Тәга­ләнең әмеренә буйсынып, фә­рештәләрнең дөньяга килә­чәк җанга тәкъдир язуларына бәйле туган. Адәм баласының баймы, фәкыйрьме буласы (ягъни ризыгының да күләме), бәхетлеме-бәхетсезме икәне шул чакта билгеләнә дә инде. Тагын бер тапкыр ассызыклыйк, аның ризыгының кү­ләме хәл ителә. Кемнәргәдер Галәмнәр хуҗасы тарафыннан мул ризык, кемнәргәдер исә ачлы-туклы яшәү, кайберәүләргә хәтта, күргәнебезчә, ачтан үлү вәгъдә ителә. Адәм баласы дөньяга килгәннән соң никадәр генә талпынмасын, үзенә билгеләнгән ризыкны арттыра да, киметә дә алмый, аңа билгеләнгән ик­мәк сыныгы башка берәү­нең ашказанына төшми һәм, ки­ресенчә, бу баланың ризыгы да башка берәүгә, хәтта үз әти-әнисенә дә аш була алмый. Шуңа күрә дә хак мө­селман кемгәдер бирелгән муллык өчен көнчелек хисе белән янмый, үз байлыгы өчен кан калтырамый, байлык алтын-акча күләмендә түгел, шөкер итүдә дип, тыныч кына яши, мал сәбәпле үз баласын бугазламый.

Инде хәзер бәхәс тудырган җөмләгә печтек кенә лексик анализ ясыйк. Сорау га­дәттә нәкъ менә шул мәгънәне төшенмәгәнлектән туа бит. Анда ризыгы дигән сүз алдыннан үз дигән ачыклаучы аергыч килә. Менә шул аергыч “ЛәкЛәк”нең соравына җавап бирә дә инде, ягъни җавап сорауның үз эчендә үк. Әлеге сүз ризыкның бар кешегә дә тигез бүленмәвен искәртә, әти-әнинең үз ризыгы, баланың үзенеке. Монда сүз күләм турында бармый, балага күпме ризык язылганлыгын без белә алмыйбыз, аның бу дөньяда күпме торачагы да, үлеме ни рәвешле булачагы да адәм баласына алдан мәгълүм түгел.

Инде хәзер үзе пенсиягә киткән хезмәттәшләремнең берсе миңа бер вакыйга сөйләгән иде. Бу урында аны китереп китү урынлы булыр төсле. Бер авылда бер үк елда ике кеше пенсиягә чыга. Берсе колхозда авыр кара эштә изелеп, минималь пенсиягә лаек була. Икенчесе, кү­рәсең, җитәкчелек эше бе­лән мәшә­кать чиккәндер, аңа персональ пенсия билге­лиләр, ягъни картлык ак­часының күлә­ме беренче авыл­дашыныкына караганда күпкә артык булып чыга. Мул пенсия алучы карт, сөенә инде, билгеле, күршесенә килеп мактана, шуның-шуның кадәр пенсия чыкты, ди. Икенчесе, күрәсең, иман әһеле булгандыр, алай көен­ми дә, күкләргә дә сикерми, сабыр гына: “Азны күп итеп тотарга язсын”, – дип Аллаһы Тәгаләгә шөкер итә. Акчасы күп булганга сөенгән пенсионер бер ел да аннан файдалана алмый, берничә айдан соң вафат була. Икенчесе исә, чынлап та, азны күп итеп тотып, инде дистә еллар тыныч кына яшәп ята. Кү­рәбез, Аллаһы Тәгалә аңа аз пенсия насыйп итсә дә, ризыгын күп әйләгән.

Инсанга билгеләнгән ри­зыкның күләмен аның бүгенге көндәге байлыгы белән бәяләп булмый. Әйтик, миллиард долларлар белән үлчәнгән байлыкка ия олигархның ризыгы урам теләнче­сенекенә караганда артык, дип өздереп раслый алмыйбыз. Бердән, ул миллиардларны олигарх, күпме тырышса да, ашап бетерә алмый, бу дөньяда калдырып китә, икен­чедән, аны иртәгә үк әҗәл көтүе һәм ризыгының инде бер көнлек кенә калган булуы ихтимал, өченчедән, үңәч рагы белән чирләгән карун да, өстәлдә ризык өелеп торган килеш, аны йота алмыйча, ачлыктан айлар-ел­лар буе интегергә мөмкин. Барысы да ана карынында вакытта Аллаһның әмере белән фә­рештәләр ни дип язганга бәйле.