Балалар тапшыруларын кысрыклыйлар

OMD MD PHD Group компаниясе Россия телеканалларындагы балалар тапшыруларын өйрәнеп, нәниләр өчен бирелгән вакытның соңгы 4 елда ике тапкырга кимегәнен ачыклаган. 4-12 яшьлек балалар аудиториясенә исәпләнгән программаларны реклам кысрыклый. Телевидениеда реклам бирү бик отышлы, ә менә балалар тапшырулары барганда роликларга карата таләпләр зуррак.

“Реклам турындагы” Россия законы нигезендә 15 минутка кадәр барган балалар тапшыруында яки мультфильмында реклам алдан, соңыннан бирелә ала, озынлыгы 1 минуттан артмый. 20 минутлык тапшыру икән, реклам 1,5 минуттан озынрак була алмый. Сәгатьтән артык программада – 3 минутка кадәр (тапшыру алдыннан һәм ахырына җиткәнче бер тапкыр бирелә). Реклам турындагы законга үзгәрешләр соңгы тапкыр 2008 елда кертелгән.

Татарстанда бала тәрбияләүче әниләр тапшырулар азаюын сизгәнме, гомумән, нәниләр бүген нинди программаларга өстенлек бирә? Бу хакта кечкенә генә сораштыру үткәрдек.

Мөршидә Кыямова (журналист):

Бер уйласаң, кече улыма телевизор карарга балалар бакчасында өйрәттеләр. Тәрбияче апалары аларга совет чоры мультиклары куя. Анда ярый дип, өйдә дә карый башлады. Ләкин күңеленә бүген ясалганы, төслесе, аңлашылмый торган, әллә нинди куркыныч геройлар булганын ярата. Без карап үскәннәренең тәрбияви ягы да бар, ләкин аларзаманча технологияләр кулланып әзерләнгәненнән шактый калыша. Тапшыруларның да “йоны коелып беткән, ире кыймылдамый” торган эт-мәчелесен түгел, матур курчаклы, мөлаем модельләр алып бара торганын ярата.

Алинә Мәликова (аш-су остасы):

Кызларым телевизор карарга бик ярата. Мультик кушып, читкәрәк китсәм, шундук пультка тотынып, каналларны күчерә башлыйлар. Чөнки мин куйган төссез, караңгы мультфильмнар аларга ошамый, ә заманчаларын мәгънәсез дип саныйм. Берничә ел элек Россиядә барыбызга да ошардай, дуслык, ярдәмләшү, яхшылык-начарлык мәгънәсен төшендерердәй мультиклар күрсәтелә башлады. Алар кичен генә күрсәтелә. Шуңа, вакыт булганда, балаларга Интернеттан күрсәтеп алам.

Айсылу Галимова (хуҗабикә):

Без үскән 90 нчы елларда "Звездный час", "Зов джунглей", "Лего-го" кебек мәгънәле тапшырулар бар иде. Хәзер шундыйрак төрдәге программалар аз. Күрше балалары белән телевизорны кушып куя идек тә, андагы ярыш вакыты беткәнче теге яисә бу эшне төгәлләргә тырыша идек. Үзебезнең ярышларны да үткәрдек. Мондый тапшырулар бүген булса, балама рәхәтләнеп каратыр идем әле. Көннән көн кими бара булганнары да...