Бөтен дөнья татарлары өчен уңайлы программа уйлап табылды!

29 июньдә Microsoft компаниясе җир шарының төрле почмагында яшәүче татарларны куандыра. Ул Казанның IT-паркында татарча "Windows 7" операцион системасы һәм "Microsoft Office 2010" программасын тәкъдим итте.

Аның уңайлыгы барлык элементларының үз телебездә ясалган булуында гына түгел, текстның татарча дөрес язылышын тикшерүендә дә! Моннан тыш программа тулысынча бушлай һәм аны дөньяның теләсә кайсы читеннән компаниянең Интернет сайты (MicrosoftTatar.ru) аша алырга мөмкин.

"Microsoft"ның татарча продуктларын тәкъдим итү чарасында Татарстан Президенты Рөстәм Миңнеханов, Татарстан Премьер-министры урынбасары Зилә Вәлиева, Россиядәге "Microsoft" компаниясенең президенты Николай Прянишников катнашты.

Республика башлыгы сүзләренә караганда, Татарстан Хөкүмәте "Microsoft" белән хезмәттәшлекне 2005 елдан бирле алып бара. Уртак проектлар итеп, татар телендәге "Microsoft ХP", "Microsoft Vista" системаларын әйтергә мөмкин. Николай Прянишников исә, үз чиратында, татар телен үстерүгә юнәлдерелгән проектларның әле аз булмасын ассызыклады. Аның сүзләренә караганда, Татарстан -мәгълүмат технологияләрендә ана телен куллана торган бердәнбер төбәк.

Мәгълүмат өчен. "Windows 7" операцион системасы һәм "Microsoft Office 2010" программасын татарчага тәрҗемә итү белән моның өчен махсус оештырылган эшче төркем шөгыльләнгән. Төркем составына ТР Фәннәр академиясе галимнәре һәм ТР Министрлар Кабинеты белгечләре кергән. Система төзегәндә 400 мең татар сүзе кулланылган.