Байлык ничә көнлек?

Әти-әниләргә баласын байлыкларына карап үсендерергә кирәкми. Бала акчаның бүген бар, иртәгә юк икәнен аңлап үсәргә тиеш.

Дустымның кызының туган көненә бүләк эзләп зур бер кибеттә йөрим. Балалар кием-салымы бутигында ташламалы көн икән – ярты ассортиментны 30 процент киметеп саталар. Тәк, мин әйтәм, Регина ак төс ярата, үлчәме туры килсә, менә бу кофтаны алсам да була. Минем белән бергә, кибеттә аналы-кызлы пар да кием сайлый. Әнисе 10-12 яшьлек кызының бер алдына, бер артына төшә – бусы ошамыймы, менә бусы сиңа килешле булыр иде, ди. Кызның борыны шактый югары булуы күз карашыннан үк сизелеп тора. Әнисе тәкъдим иткән кофталарны җирәнеп кенә чеметеп ала да: «Фу, отстой», – ди. Безнең балачакта төшкә дә кермәгән затлы чүпрәк-чапрак шулай бер-бер артлы «брак»ка чыгып бара.

Кызның әнисе инде кибеттә йөри-йөри, кием сайлый-сайлый арыган кыяфәттә, әмма шулай да йөрәк җимешенең көенә генә тора. Фирмаларының исемнәрен әйтә-әйтә: «Кызым, нәрсә киеп барырсың соң туган көнгә, бернәрсәне дә ошатмыйсың бит», – дип, һаман элгечтәге кием-салымнарны актара. Мин исә шаккатып басып торам – ташлама белән 950-1100 сум торган киемне, «бу колхоз киеме», дисен әле балаң! 10 яшендә аңа мең тәңкәлек кием кию «позор» икән, 15-20дә нәрсә сорар соң бу кыз?!

Әлбәттә, һәркемнең баласына нинди кием алу аның шәхси эше. Әмма әти-әниләргә байлыгыннан чыгып, баланы алай азындыру дөресме икән? Байлык бит ул шундый нәрсә – бүген бар, иртәгә юкка чыгарга да мөмкин. Ә бүген шундый иркен тормышта яшәгән, 1000 тәңкәлек кием киюне мескенлек итеп кабул итүче бала акчага кытлык кичерү дигән нәрсә белән очрашса, нишләр соң? Болай да кай якка бөгелүе билгесез бала психикасына акча төшенчәсен шулай рәхимсез рәвештә кертү ата-ананың гомерлек хатасы булмасмы?

Мин Регинага дигән ак кофтаны сөенә-сөенә алып кибеттән чыкканда шундый уйлар кичердем. Өлкәннәр әйтмешли, уеннак уймак чыгармасын иде кайбер «текә» ата-ана – бала язмышы акча язмышы түгел. Ул яшьтә әниең алып биргән һәр кием балаларча куаныч алып килергә, аның нинди бәядә булуы баланы борчымаска тиеш ләбаса.