“Кызым, фатирны сатып, йорт алды. Ә мин анда сыймадым”

Һәр атнаның дүшәмбе көнендә монда төрле оешма вәкилләре килеп, мохтаҗларга ризык һәм башка кирәкле әйберләр таратачак.  Марафонны бүген массакүләм матбугат чараларында эшләүчеләр башлап җибәрде.  

 

Журналистлар, Казанның нәкъ үзәгендә урнашкан туклану пуктына җыелып, әби-бабайларга борщ ашы белән кайнар чәй таратты. Чәй янына кәнфит белән печенье да бар иде. Аш исә Казанның бер кафесында пешерелгән. Бу пунктта көненә ике тапкыр ашаталар. Төштән соң сәгать өчләрдә тагын кайнар ризык китерелә.  

 

“Кеше приюты” попечительләр советы һәм “Меценатлар” бизнес-берләшмәсе рәисе Ильяс Гыймадов билгеләп узганча, социаль тернәкләндерү үзәге коммерцияле булмаган оешмасы һәр көнне мохтаҗлар өчен ике мең порция ризык әзерли. Бүгенге көндә Казанда һәм берничә республика районында уналты бушлай ашату пункты эшли.

 

–  Бушлай ашарга килүчеләрнең туксан проценты – өлкән кешеләр. Пенсияләре, нигездә, фатир өчен түләүгә һәм даруларга китеп бара. Монда килеп, алар итле кайнар ризык ашый ала, – ди Ильяс Гыймадов. 

 

30 октябрь көнне, Өлкәннәр көне уңаеннан, туклану пунктына килүчеләргә бәрәңге, ярма, үсемлек мае һәм ит тә өләшкәннәр. Кияргә киемнәре булмаучыларны киендереп тә җибәрәләр.

 

“Кеше приюты”на авыр хәлдә калган башка категория кешеләр дә килә. Алар арасында эшсез һәм документсыз, фатирсыз калучылар да, якыннарына кирәксезгә әйләнгән авыру кешеләр дә бар. Яңа документлар эшләткән арада алар шушында яши, эшкә урнаша. Юлына кайтырлык акча туплагач, китеп баралар. Кемдер фатир арендалап яши башлый. Мөмкинлекләре булмаганнарны картлар яки инвалидлар йортларына озаталар.

 

Нина Уварова, пенсиядә булса да, ишегалды җыештыручы булып эшли. Биредә икенче елын яши икән. 

 

–  Кызым, фатирыбызны сатып, йорт алды. Ә мин анда сыймадым. Син бер-ике ай берәр җирдә яшәп тор, мин сиңа бүлмә алырмын, диде. Үзләре янына чакырмады. Кая яшисең дип тә кызыксынмый. Шул көннән бирле монда яшим. Ишегалдын җыештыручы булып урнаштым. Монда инде үз өемдә кебек яшим, – дип сөйләде ул.

 

Ильяс Гыймадов әйтүенчә, мохтаҗлар пунктында бүген кырыклап кеше яши. Алар өчен мунча, чәчтарашханә дә эшли. 

 

Марафон кысаларында “Кеше приюты”на министрлыклар, ведомство, дәүләт структуралары, банк вәкилләре, «Ак Барс», «Уникс», «Рубин», «Зенит-Казань»  клублары спортчыларының да килүе көтелә. 4 декабрьдә исә, марафонга йомгак ясалып, Бөтенроссия эшмәкәрләр форумы узачак. Анда бөтен Россиядән җыелган 1100 эшмәкәр катнашачак.