"Баланы исән килеш бирмәячәкмен, диде..."

10 ел элек Дамира,  Башкортстаннан китеп, Төркиядә Мостафага кияүгә чыккан. Анда тәрҗемәче булып эшкә урнашкан. Алар Мерсин шәһәрендә яшәгән. Гаиләнең Мехмет Нури исемле уллары туа. Аерылышканнан соң суд баланы әнисе белән калдыра, әмма ата кешегә ара-тирә аны үзе белән алып китәргә рөхсәт ителә. Тәүдә Мостафа, бер ел элек чамасы элекке хатынына килеп, баланы көчләп үзе белән алып китмәкче була. Дамираны кыйный, улын буа башлый. Ул вакытта полиция килә һәм ата кешегә улын үзе белән алып китәргә рөхсәт итми.  Полиция Мостафа белән әңгәмәләшә, әмма бала белән күрешүне тыймый.

 

Бу хәлдән соң Мостафа мошенниклык өчен төрмәгә эләгә. Күптән түгел ул “каникул”га чыккан (Төркиядә тәртипләре яхшы булган җинаятьчеләрне ике атнага “ялга” җибәрәләр икән). 19 августта ул элекке хатыны янына килеп, Мехметны ял көннәренә үзе белән алып киткән. Әмма баланы кире китермәгән. Хатыныннан акча таләп итеп, янап, смс-лар яза башлаган.  

 

–25 август көнне мин аның белән мессенджерларда язышкан барлык хәбәрләрне туплап, полициягә илттем, гаризаны кабул иттеләр, кулдан килгәнне эшләрбез диделәр. Ләкин хокук сакчылары: “Ничек сез шулай уйлый аласыз? Ата кеше баласына беркайчан да зыян итмәячәк”, – дип аптырадылар. Ә ирем язган хәбәрләрдә ачыктан-ачык янаулар ярылып ята иде, ул миңа баланы исән килеш бирмәячәген әйтте. Син аны  зиратта гына күрәчәксең, диде ул. Мин улымны үзаллы эзләп тапмакчы булдым, кайларга гына шалтыратмадым, әмма бала юк иде, – боларны кайгыга баткан ана Телеграм-каналларда таралган видеода сөйли.

 

Фаҗига 8 сентябрь төненә каршы теркәлгән. Төркия матбугат чаралары хәбәр итүенчә, Мостафа улы белән туганнарына кунакка бара. Анда ул Мехметка 7 тапкыр пычак белән суга, сабыйның муенын кисә. Ахырда үзенә кул салмакчы була. Ирнең котлары очкан туганнары ашыгыч ярдәм һәм полиция чакырта. Әле Мостафа дәваханәдә, аның хәле авыр дип бәяләнә.

Ул төрмәдә тагын 18 ел утырырга тиеш булган. 

 

Фото:SHOT Telegram-каналы