"Әнисе янында торырга уйлаган иде. Өлгермәде, гәүдәсе генә кайтты..."

–    Гәүдәләрен Йошкар-Оладагы моргтан алып озатып җибәрдек. Үземнең дә барасым килгән иде. Әмма Ринатның (Гөлнараның ире. – Авт.) хәле авыр, ул-бу була калса, ерак юлдан кайтып өлгерә алмам дип бармадым, – ди Ринатның бертуган апасы Фәридә. Әниләре дә ике инсульт кичергән кеше. Уколлар белән генә тора, аның өчен дә бик кайгырам, ди Фәридә.

 

Соңгы тапкыр апалы-энеле фаҗига буласы көнне иртән сөйләшкәннәр. Берничә көнгә генә булса да ял итеп кайтырга ниятләгән алар. 

–    Энем кранчы булып эшли. Эшеннән бик китә алмый. Гөлнара да ял итәр дип, берничә көн сорап алып, Яльчик күленә барырга уйлаганнар. Гаилә белән беренче тапкыр чыгулары иде. Кәефләре бик әйбәт иде. Кирәк-яраклар алырга дип кибеткә кергән идек, хәзер юлга кузгалабыз, диде Ринат. Ватсапка статуска куйган фотоларын карап, алар өчен сөенеп утырдым. Гарасат турында кич хәбәрләр белән танышып чыгыйм дип телефонымны ачкач кына белдем. Һәлак булучылар да бар дип язганнар. Шуннан Ринатка шалтыраттым, аның телефоны сүнгән иде. Гөлнарага шалтыраттым, аның телефонын тикшерүче алып, авыр хәбәрне ул җиткерде, – дип сөйләде Фәридә.

 

Ринат белән Гөлнара интернет аша танышып кавышканнар. Гөлнара декрет ялына киткәнче Казан кооператив институтында кадрлар бүлегендә эшләгән. 

–    Бер ай элек кенә Көек бистәсендә ипотекага фатир алдылар. Аңарчы Салават күпере микрорайонында фатир арендалап яшәделәр. Үз куышлары булганга бик сөенгәннәр иде. Рәхәтен генә күрә алмадылар. Киленебез безне дә бик якын итте. Атна саен авылга кайтып йөрделәр. Гөлнара бик сабыр, тыныч кеше иде. Кызлары Ясминә белән София икесе дә әтиләренә охшаган иде. Гел әтиләренең кечкенә чагы инде. Ясминәгә – ике яшь, Софиягә ике генә ай иде. Туганнарның күбесе кечкенәләрен әле күрергә дә өлгермәде. Гөлнара Башкортстанга барып, бераз әнисе янында торырга уйлаган иде. Өлгермәде, гәүдәсе генә кайтты. Әнисенә Аллаһы Тәгалә сабырлык бирсен. Үзебезгә дә бик авыр. Ринат белән берәр хәл була калса, әниенең йөрәге күтәрмәячәк дип куркам, – ди Фәридә.  

 

Энекәше Ринат республика клиник хастаханәсендә реанимациядә. Әле дә аңына килә алмый. Исән генә калса иде, дип ут йота якыннары. Хатыны һәм кызларының һәлак булуын ул беләме-юкмы, билгесез. Фәридәнең әйтүенчә, ашыгыч ярдәм бик озак килгән. 

 

Газета аша ярдәм кулы сузган һәр кешегә рәхмәтен җиткерүне дә сорады. 

–    Салават күперендә күршеләре белән бик тату яшәделәр. Иң беренче булып та алар ярдәмгә килде. Машина табып, Гөлнараны озатырга булыштылар. Питрәч районы хакимиятенә дә рәхмәт. Чыгымнарны алар каплады. Кәфенлекләргә хәтле алып килгәннәр иде. Хәл белешүчеләр дә күп. Барысына да җавап биреп бетереп булмый. Бик авыр вакытыбыз. Бер дә уйламаган җирдән килеп чыкты бу хәсрәт, – ди ул.  

 

Сәлимовларның якыннарына күркәм сабырлык телибез. Аллаһы Тәгалә ярдәменнән ташламасын!