29.07.2023 Мәдәният

Бүген Хәйдәр Сафин 70 яшьлек юбилеен билгели (ФОТО)

29 июль көнне Г.Тукай исемендәге Татар дәүләт филармониясе сәхнә ветераны, музыкант-аккомпаниатор, Татарстанның атказанган мәдәният хезмәткәре Хәйдәр Хәбибулла улы Сафинга җитмеш яшь тулды. Аны күркәм юбилее белән котлыйбыз!

Ул Татарстанның Апас районы Күлкаш авылында тугыз балалы ишле гаиләдә туып үсә. 1972 елда Хәйдәр Сафин Казан педагогия институының музыка факультетына укырга керергә карар кыла. Иң беренче Рәгъде Халитов классында укый башлап, профессиональ музыка сәнгате белән таныша башлый. Институтта укыганда ул Марс Макаров белән таныша, аның баянын сатып ала. Күп тә үтми, ул аны халкыбызның яраткан җырчысы Әлфия Авзалова белән таныштыра, үзенә консерваториягә укырга керергә кирәк булу сәбәпле, Әлфия апа белән гастрольләргә чыгарга дип Хәйдәр Сафинны тәкъдим итә. Әлфия Авзалованың башкарган җырларын пластинкалардан ишетеп отып алган студент егеткә атаклы җырчыга уйнавы авыр булмый, гастрольләрдән кайткач Әлфия Авзалова аның уйнавын ошатып, Марс Макаровка рәхмәтләрен әйтә. Тора-бара 1976 елда Казан дәүләт педагогика институтының музыка һәм җыр факультетын тәмамлап, хезмәт юлын Г.Тукай исемендәге Татар дәүләт филармониясендә эстрада бүлегендә Әлфия Авзалова төркемендә баянчы булып эшли. Легендар җырчыбыз белән ул илебезне иңләп чыга, кайда гына чыгыш ясамыйлар алар.

Хәйдәр Сафин 1973 елдан алып Ленин исемендәге Мәдәният сараена йөрергә дә вакыт таба. Хормейстеры ТАССРның атказанган мәдәният хезмәткәре Суфия Шаһиева, баянчысы Наил Бариев булган Татар хорының музыкант-аккомпаниатор булып эшли. Ул 1976-1982 елларда Татарстан телерадиокомпаниясенә Татар хоры белән утыз җиде җыр яздыра.

1980-82 елларда ул бөек җырчыбыз Илһам Шакиров иҗат бригадасында музыкант-аккомпаниатор буларак эшли. Хәйдәр абый Сафин Татар дәүләт филармониясендә беренче концертларын әлеге легендар җырчылар белән бергә куя. Биредә ун ел эшләү дәверендә Татарстан авыллары һәм шәһәрләре, Россия өлкәләре, Идел буеннан – Уралга, Уралдан – Камчаткага – гастрольләрнең географиясе әнә шулай киң була. Ул шулай ук Фәхри Насретдинов, Рафаэль Ильясовлар белән гастрольләрдә була.

1984 елдан Хәйдәр Хәбибулла улы Казан педагогия училищесында укыта башлый. 25 ел эшләү дәверендә укучылар ансамбльләренә аккомпаниатор була, төрле ачык дәресләр күрсәтә. Эшендәге уңышлары өчен Россия Федерациясе мәгариф отличнигы дәрәҗәсенә ия була.

Хәйдәр Хәбиб улы Сафин 2005 елдан алып бүгенге көнгә кадәр Айдар Фәйзрахманов җитәкчелегендәге Татарстан Республикасы фольклор музыкасы дәүләт ансамбленең администраторы вазыйфасында. Ул шулай ук Татар филармониясе сәхнә ветераннары «Илһамият» клубының төрле концерт-чараларын оештыручы-администратор, «Балкыш» Республика фестивале һәм Арча төбәгендә узучы Рамил Курамшин исемендәге Республика баянчылар конкурсы жюри әгъзасы да. Үз эшен яратып һәм җиренә җиткереп эшләүче милләтпәрвәр сәхнә остасына саулык-сәламәтлек, озын гомер, күңел тынычлыгы, иҗади уңышлар телибез.