40лылар бетә

Юлдагы камералар арта, аның каравы тизлекне чикләүче юл билгеләре кимеячәк. Татарстанның ЮХИДИ идарәсе башлыгы Рифкат Миңнеханов йөртүчеләргә әнә шундый хәбәр җиткерде.

Быелның өч аенда гына да республикада 850 меңнән артык кагыйдә бозу очрагы теркәлгән (узган елгыдан бу 22 процентка күбрәк). 450 меңен камералар ярдәмендә ачыклаганнар. Шулардан 366 меңе – тизлек арттыру, 22 меңе – кызыл утка туктамау, калганы исә машинаны ярамаган урында калдыруга бәйле.

Тәртипкә өйрәнәбез

"Камералар булмаган вакытны искә төшерик әле. Тизлекне 60тан арттырырга ярамаган урында бездә 100 белән чабалар иде. Шуңа күрә 40лы билгеләр куярга туры килде, – диде ул. – Хәзер исә Казанда 60-70 белән йөри башладылар. Шуңа күрә шәһәрдә тизлекне 40тан арттырырга рөхсәт бирмәгән юл билгеләрен алырга уйладык. Республика юлларында да шундый эш алып барылачак һәм һәркайда диярлек 90 белән йөрергә мөмкин булачак".

Хәзерге вакытта Татарстанда тизлек һәм светофорга туктау-туктамауны тикшерә торган 600гә якын җиһаз эшли. Боларга 20 "Паркон" системасын һәм 500 "ялган" җиһазны да (болар антирадарга сигнал җибәрә, әмма штраф "җибәрми") өстәсәң, соңгы вакытта юлларда машиналарның ни өчен акрынрак хәрәкәт итүен аңлавы кыен түгел. Озакламый штраф билгеләүче җайланмалар тагын да өстәләчәк. "Паркон"нар исә Чаллы, Түбән Кама һәм Әлмәттә дә пәйда булачак. ЮХИДИ идарәсе башлыгы Рифкат Миңнеханов әйтүен­чә, хезмәткәрләрнең эше болай да күп. Шуңа күрә төп йөкне автомат җиһазларга тапшырмакчылар. "Киләчәктә инспекторлар кагыйдә бозуларның 15-20 процентын гына ачыкларга тиеш, – диде ул. – Аларның төп эше – юл хәрәкәтен көйләү. Шуңа күрә машиналардагы тизлек үлчәү җиһазларын да сү­тәчәкбез".

Ә менә "бәхет хаты" алучылар артырга мөмкин. "Кыш көне һава торышы руль артында утыручыларның каеш эләктерү-эләктермәвен ачыклавы авыррак булды. Хәзер исә күренәчәк. Киләсе атнадан җәяүлеләргә юл бирмәгән йөртүчеләргә дә "бәхет хатлары" җибәрә башлаячакбыз. Иң зур хыялым: заманча җиһазлар ярдәмендә салмыш йөртүчеләрне ачыклау, – диде баш инспектор ике көн элек узган матбугат очрашуында – Ә радар алучыларга рәхмәт. Чөнки алар йөртүчене кагыйдә бозудан саклый. Тик бу җиһазларны урлыйлар шул. Моны булдырмауның бер генә юлы бар: ЮХИДИ идарәсе башлыгы кебек, ягъни минем шикелле, кагыйдә бозмыйча йөрегез. Проблемалар булмас. Чит илләрдә кагыйдә бозган баш инспекторларны эштән куялар. Ә минем эшсез каласым килми". Элек исә андый хәлләр булгалаган һәм Миңнехановка да дүрт "бәхет хаты" килгән. Баш инспекторга хәтта министрлар да зарлана икән. Әйтик, берсенә бер көн эчендә 8 квитанция килгән. "Түләргә туры килә, – диде Миңнеханов. – Барыбыз да тигез".

"Искә төшерерсез әле"

Берничә көн элек "Россия юлларының иминлеге өчен" үзәге, зур шәһәрләр арасында иң куркыныч юллар – Казанда, дип белдергән иде. "ВТ" Рифкат Миңнехановның бу рейтингка мөнәсәбәтен сорашты. "Әйе, проблемалар бар, әмма башкалар белән чагыштыра алмыйм, – диде республиканың баш инспекторы. – Дөрес, без түрәләргә меңнән артык кисәтү юлладык, 300ләбенә җәза бирелде. Юллар яхшы булса, бу саннарның берсе дә яңгырамас иде. Әмма мәсьәләнең башка ягы да бар. Безгә Универсиада да, яхшы юллар да бер үк вакытта кирәк. Казанда узган гасыр ахырыннан бирле зур төзелешләр бара. Шәһәрдә нинди зур йөк машиналары йөри! Юллар исә андый авырлыкка исәпләнмәгән. Әгәр бүген миллиардлаган сум сарыф итеп, аларны төзекләндерәбез икән, иртәгә ул юллар тагын җимереләчәк. Тагын бераз түзик – 2013 елга юллар әйбәт булачак. Минем сүзләремне искә төшерерсез әле!.. Дөрес, аннары 2018 елга әзерләнә башлаячакбыз".

P.S. Быелның өчен аенда Татарстан юлларында 869 авария булган. 1152 кеше җәрәхәт алган, 89 юлчының гомере өзелгән. Барлык саннар да узган елгыдан азрак.